Kibong kümer mapa kecha meinyaki jangratema alir : Rani Mukerji

Mumbai, July 31 (Agencies) : Yaküm Bollywood actress Rani Mukerji-i Yash Raj Films (YRF) tanishir Aditya Chopra den kibong aküm aser tang lai kibong akümba sülen mapa kecha meinyaki jangratema alir, ta lai metetdaktsü.
Vogue India August 2015 adok atema la den sensaksem ka agidang, Rani-i la kibong makümdang, lai sapuba film tem aser la tarutsü sentongtem indang lemsatep.
Rani-i küm 20 tema Bollywood nung shilem agia aru aser lai film produce mesüra direct asütsü sentong ali asü mali ta asüngdangdang “Ni noktanger shinga mali. Adi (Aditya Chopra)-i kodanga kü dang ma ta mashitsü, saka ni kü kinüngbo mapa inyakba meteta lir. Pa indang studio nung pai aonung menua tashi kanga meranga inyaker. Ni pa mesüra company tenüng nung junga shia memetet ser mapa inyaktsü temulung agi magizüker. Tang atemabo, ni kibong kümer mapa meinyaki jangratema alir,” ta Rani-i langzü.
Rani-i ‘No One Killed Jessica’ aser ‘Mardaani’ film tem amala nung shilem tajung agiogo aser item asoshi lai la kinüngbo dena tebur asem nem tenüngsang agütsür.
“Hao, pa (Aditya Chopra), Shah Rukh (Khan) aser Aamir (Khan) nungertemi ni yari. Aamir-i ni Ghulam nung shilem agidaktsütsü atema Mukesh Bhatt aser Vikram Bhatt na dang tuyu. Kü wadang nung item nisung asem yagi ni kanga yariogo,” ta laisa metetdaktsü.