Kim den senden amentsüba onük mejembitsü : Moon

Pyeongchang, Tsüklai 17 (Agencies) : North Korea lenir, Kim Kim Jong Un den temaba jenjang nung senden ayongzüka amentsü atemaji tangbo mejembitsü, ta South Korea President Moon Jae-in-i metetdaktsüogo.
Olympics asayamong nung North Korea nungera shilem agidaktsütsü nükjidong yur pai meranga inyakba jagi ano North aser par tsükchir, Washington na tsüngda nunga tesendaktep tajungba kümdaktsütsü aserbo North Korea-i nuclear bomb yangluba anendaktsütsü atema ken o jemitsü asoshi lenmang lapoktsü teimla akar, ta paisa metetdaktsü.
Aji oda süaka, tashiyim agi yimsü asüsang North Korea lenir, Kim Jong Un-i senden amentsü jaokba onük nung iba sendenji mamendang kechi inyaktsü nüngdaker, ta ‘The Associated Press’ ajanga asüngdangba nungbo Moon-i telangzüba kecha magütsü.
Par office ajanga ashiba agi, ‘senden indangjibo talangka jembia moli’ ta, paisa tamalena metetdakja lir. North Korea leniri jaokba shity koba Tsüklai 10 nü Kim tenu, Kim Yo Jong ket ajanga agütsüogo, iba nungji ano Moon-i oshidang magütsüi lir.
Ken o jembitsü asoshi Korea nungeri lenmang yanglutsü atema meangtsüla, ta dang pai metetdaktsüogo.