Kim Jong-i yimjung aginür asü?

– Among P. Aier

Tsüklai 9-25, 2018 tashi PyeongChang, South Korea nung 2018 Winter Olympics nung North Korea
nungi teshimtet telok kati South Korea den shilem agiba ajanga Korea linük ana tsüngda tesentaktep tajungba akümtsü atema lenmang ka lapoker asü ta alimai bilemer. Winter Games nung pelatepa shilem agiba ajanga North Korea indang nuclear program atema olemtep tenzüka agitettsü asü? ta nisungtemi jembiteper. 2018 Winter Olympics lapokba sentong nung South Korea President Moon Jae-in, US Vice President Mike Pence, Japan Prime Minister Shinzo Abe aser North Korea lennir Kim Jong-un tenu Kim Yo-jong-i anir North Korea teshimtet teloktem aden. Kim Jong-i South Korea Tir Moon Jae dang North Korea nung senden ka nung adentsü jaokba osang sangoktsütsü atema pa tenu South Korea-i yok aser Olympics mapang Moon aser Kim Yo na pezüben tashi ajurutepa liasü. Iba ya küm aika sülen Korea linük ana tsüngda temaba jenjang nung ajurutepa jembishinüba lir. Moon-i North Korea semdanga senden nung denra, ibaji otsü tasen ka asütsü, kechiyong Kim Jong-i bendanger lennir shinga dena majuruteper. North Korea-i taküm Winter Olympics nung shilem agibaji North Korea-i South Korea aser United States tsüngda tesendaktep raksatsütsü atema alizüng yur iba mapa inyaker ta alima nung lennir karibo tsübua bilemba osang metetdaktsüogo. Ajisüaka, iba inyakyim nung mapa tajung ka ta ajitetbaji US Tatong Tir Pence-i Trump’er sorkari North Korea den olemteptsü mulunga lir ta ashiba olen lir. Kechiba ta süra anogo ishika tejakdang Pence-isa North Korea-i nuclear weapons yangluba mapa manenra parnok den olemtep malitsü ta shia liasü saka North Korea-i Olympics nung shilem agiba sülen pai iba oren melenshia jembir. Trump-i aniba US sorkari North Korea anema arur aser Winter Olympics nung shilem agiba nunga parnoki temulung melemtetba indang jembia aruogo. North Korea nung sorkar ketdangsübarenji tesempatsüka lir saka alima nung North Korea indang nuclear program ama khuret tulutem atema telemtetba ka agitsü atema inyakba lennirtem khenkhenbo tila kümer inyaksangshitsü nüngdak. Taküm Winter Olympics nung shilem agibaji North Korea-i South Korea o United States tsüngda tesentaktep raksatsür parnok ajangzüktsü atema alizüng yur inyakba mapa ka asü mesüra parnoki nuclear ken o aser tanga ashishitep ken o tem angatettepnür ta tasüngdangbatem lir. North Korea anema tenokdangba takangba agütsütsü atema Trump-i alima lennirtem anidentetogo saka pai Kim Jong den yimjung olemtep alitsü mulunga lir asü masü’ar memetet. Ajisüaka, North-South Korea senden amenba ajanga iba telangzübaji asenoki kobi melii metettsü. North Korea-i nuclear program inyakbaji United Nations Security Council telemtetba anema lir aser iba ya alima asoshi lendong ka ta züngshir. Anungji, Kim Jong-i iba khuret atema süoki ia bilemer süra, pai tekaraba nung North Korea tepuokdak yua aliba America nunger asem chioktsüla mesüra par nuclear & missiles tendangba maparen anena atar ta osang ka sangdongtsüla. Tanü alima nung akhidang ama rara adokra meimchirtemi metizüktsü ta tsübuba agi alima lennirtemi rara madokdaktsütsü atema linüktem tiyongtsü nung ia ken o tem angatepdaktsütsü meranger. Alima nung lendong keta aliba linüktem rongnung North Korea ya ka lir aser parnoki küptepba inyakdi ta süra, meimchir taküm aika lalutsü aser alima nung mepetmesü tulu adoktsü. Anungji, iba khuret koktettsüba aser angatetteptsüba nung South Korea linük indang shilem tulu lir. Kim Jong-un-i yimjung aginür süra South Korea Tir Moon Jae-in-i tekaratiba nung iba apuji latsütsüla.