Koba solution indang jembir

Tanü Core Committee of Nagaland Tribal Hohos and Civil Organisations (CCNTHCO)-i ketdangsüa Naga nunger lennir kari India sorkar dang election magidang Naga yimten tamasa latettsü atema takhangba agütsür. Nagaland sorkar kümsük tembangtsü mapang tonga aruba agi Election Commission of India (ECI)-i Tsüklai 27, 2018 nü Nagaland nung assembly election agitsü osangbo metetdaktsüogo saka tanü Naga nunger lennir kari election thinena atatsü aser Naga yimten tebilemtsü atema telemtetba ka mezüng agitsüla ta Centre sorkar dang rongshir. Naga yimten tebilemtsü ya küm 70 shi tain lir aser Naga nüjiso bushiba telok balalai iba tebilemtsü angatetteptsü aser Naga yimten latettsü atema Centre sorkar balala den olemtepyonga arur. 1997 küm nungi NSCN-IM aser India sorkar tsüngda ceasefire alitsü nangzüktep aser iba küm nungi Naga yimten latettsü atema ken o jembiyonga arur. NSCN-IM ya Northeast nung telungpur teloktem rongnung tulutiba aser tesashitiba ta züngshir aser iba jagi India sorkari parnok den yimjung olemtep tenzükba ajanga Nagaland atema dang masü saka Northeast ajunga atema langka tajung ka adoktsü südi ta nübortemi teimla ayu. Küm aika imlaa arur Luroi 3, 2015 nü NSCN-IM aser Centre sorkar tsüngda Framework Agreement agitep aser idangji joko Naga yimten yakta latettsü südi ta nübortemi bilem saka iba tenangzüktep agir joko küm ana tema süia aruaka Naga yimten tebilemtsü kokteta aoba kecha balaka majiteter. Yamaji lia ano yaküm Naga yimten telok 6- GPRN/NSCN, FGN, NNC (Parent Body), NPGN/NNC (NA), NSCN (R) aser NNC/GDRN (NA) külemi sabang ka nung longjemer Working Group ka kümtet aser parnoki Naga yimten tebilemtsü atema Working Committee ka tentet. Iba Working Committee-i India sorkar den yimjung olemtep tenzüktsü atema tenangzüktep agiteper Centre sorkar den sendentem menogo. NSCN-IM den yimjung olemtep tenzüker küm 20 tema süiaka telemtetba ka magiteti lia aser nisung aikati Framework Agreement nung keta aliba onüktem yimjak nung metetdakjang ta akhangba mapang ka nung. Aser ano yaküm nungi Working Committee-i Centre sorkar den olemtep tenzükba nung benoka jembiba mesüra akhangba onüktem-a komala benoka jembiar memeteti aliba mapang ka nung tanü Naga yimten tangsa tang latetang ta akhangba yabo tim masü ama bilemer. Naga nunger kari akhanger ta sür Centre sorkari NSCN-IM den Framework Agreement agiba nung keta aliba onüktem nung ajemdaker Naga yimten latettsüra aser ibaji Naga nunger ajungaibo magizüktettsüsa süra, tanü Naga yimten latetang ta akhangertemi iba telemtetbaji agizüktsü asü? Mesüra, yaküm nungi olemtep tenzükba Working Committee-i benokba onüktem nung ajemdaker Centre-i Naga yimten latettsü atema telemtetba agira aser ibajia Naga nunger ajakibo magizüktettsüsa süra, tanü takhangba agütsürtemia iba telemtetbaji agizüktsü asü koda? Naga yimten tebilemtsü ya kanga dang tejen aser küm aika mebentetti aruba onük ka lir. Anungji Naga yimten ya künüyongi dangbo latettsü makok aser ajak dang tongtipangbaji Naga nunger yamai dang lemsar lira, tangsa tangbo melatettettsü südi ta arentaka bilemer. Hao, tanü Naga yimten latetang ta akhangbaji pusema nungiter saka koma latettsü, shir teloki akhangba ama latettsü ta ratar. Tawa tasen tentetba telok CCNTHCO-i Naga nunger tarutsü atema bilema election masü Naga yimten latetang ta akhanger aser ibaji tim dang, saka mapang tai ka nung iba ola adoker ama bilemer. Tamasa Naga nunger lennirtemi tema aser telung nung aliba Naga nunger ajak ka küma longjemtsü asoshi mapa inyaktsüla aser ibaji koktetba sülen ang yimten latettsü atema mapa inyakra, tetsükdaktsü balaka majuruidang asenoki aginüba ama Naga yimtenji latettsü.