Kohima Bench-i NPF Whip onük October 12 nü angadangtsü; Party Organisation nung legislature wing shilem mali: Kenye

Kohima, September 21 (TYO): Kohima Bench of Gauhati High Court (GHC)-i maneni Naga People’s Front (NPF) whip ken o October 12, 2017 nü ang angadangtsü anogo atsülangshiogo.
NLA Speaker, Dr. Imtiwapang Aier-i T R Zeliang, NPF whip agizükba dak sendakba nung NPF Tir, Dr. Shürhozelie Liezietsu-i PIL ka benokba sülen July 24 nü GHC Kohima bench nung iba ken o ya benoka liasü.
Tang agi asembenbuba iba ken o angadangtsü anogo atsülanger.
Tanü Kohima nung aliba NPF Central office nung osangbenertem den jembidang Rajya Sabha MP aser NPF Secretary General, K G Kenye-i, kecha tensa nunga Legislature Party-i Party Whip shimtsü makok, kechiyong Chief Whip ya shimba menden ka lir, aser ibaji Party Tiri dang shimtsü akok, ta metetdaktsü.
“MLA temi Legislative Party lenir shimtsü akok, saka Chief Whip bo shimtsü makok. NLA Speaker-i 2014 November nungi Party whip Kiyanielie Peseyie shima aliba mashishie Zeliang NPF whip agizükba ajanga Assembly Rule of Business inyakyim raksaogo,” ta pai ashi.
Lok Sabha MP, Neiphiu Rio-i aniba NPF-i yashi Dimapur nung Party genereal convention nung party nung inyaker nisung 32,000-i Dr Liezietsu Tir asütsü magizük ta sangdongba dak sendakba nung Kenye-i, “Parnoki, pusemer nisung lakh kati Dr Liezietsu lenisüba maginer ta shiaka parnokji shidakba NPF Party nung inyakertem asü ? ta asüngdangtsüsa lir,” ta ashi.
Pai ashiba agi, NPF Party nung inyakertem tenüngji Election Commission of India (ECI) nem agütsüogo, aser NPF nung inyakertem tenüng aliba Master Register ji NPF Central Headquarters, Kohima nung lir.
Paisa ashiba agi, Rio den anenja aliba NPF MLA 36-i General Convention nung 2015-20 tashi Party Tir asütsü atema Dr Liezietsu shimba nung sign süa lir, aser ibaji ECI nem agüja lir.
“Parnoki inyakyim tai ajanga Naga nunger ashioktsütsü meranger, saka parnoki ECI bo ashioktsütsü makok,” ta paisa ashi.
Paisa, MLA temji Party indang Legislaive Wing dang lir, anungji party nung office ketdangpurtem shimtsü mesüra agientsü atema parnok dak tashi mali aser Party Organisation nung legislature wing shilem tulu mali, ta ashi.
Kenye-isa, Rio aser Zeliang nati aniba teloki NPF party, ta ser telemtetba agibatemji tamagila, ta ashi.
Iba dak sendakba nung pai NPF nung lenirtem aser inyakertem dang party tangatetba nung ajangajanga alitsüla, aser Dr Liezietsu nungittsüla, ta ashi.