Krrish 4, 2020 Christmas mapang sayatsü sangdongogo

Mumbai, Aenjeti 12 (Agencies): Hrithik Roshan arishi küm 44 ajungba anogo nü pa tebu Rakesh Roshan-i Krrish 4, 2020 Christmas nung sayatsüba sangdongogo.
Iba osang ya pai Twitter ajanga lemsatepa liasü.
“‘Krrish 4’ officialy sayatsüba anogo tajungtibaji tanü asütsü. Iba film ya 2020 Christmas nung sayatsü. Iba ya Hrithik tasoba anogo tenüng nung nenok ajak nem sempet ka ama agütsür. Happy birthday Hrithik,” ta senior Roshan-i post sütsü.
Hrithik-i tang tashi nung Krrish film tatongtep asem nung shilem agiogo. Iba film ya 2006 küm science fiction superhero film ka ama tenzük. Iba film otsü ya Rakesh-i zülu aser paisa direct süa produce asür. Iba film nung Priyanka Chopra, Rekha, aser Naseeruddin Shah nungeria tongti shilem agir.
Iba tatongtep film ya blockbuster film Koi… Mil Gaya (2003) sayaba nungi tenzük. Iba film nung Hrithik-i mata mabensar ka ama shilem agir, shiba alien ka den medemer akümer.
Hrithik tang Anand Kumar indang taküm otsü film nung shilem agitsüba atema ternemshidak lir. Iba film nüngja ya “Super 30” lir aser iba ya pa asoshi nisung shidakba ka indang taküm otsü ashiba film nung ka nung tang mezüng shilem agitsüba lir.