Kü taküm amokmerenaka ni metsübutsü: Deepika Padukone

New Delhi, November 18 (Agencies): ‘Padmavati’ film dak sendakba nung iba film anemer telok kati actress Deepika Padukone amokmerenogo ajisüaka lai, la taküm amokmerenaka lai metsübutsü, ta ashi.
Film yanglur, Sanjay Leela Bhansali indang ‘Padmavati’ film mesayadaktsütsü atema telok aikati akhanger aser tang private screening ajanga CBFC tongti, Prasoon Joshi jashidaktsüogo.
Taküm January ita nung Rajput Karni Sena teloki Bhansali aija liasü aser Jaipur fort nung iba film tangokdang timtem agüja liasü, aser tang iba telok nung züngsemtemi iba film nung tongti actress, Deepika Padukone taküm amokmerener.
Rajpur Karni Sena nungi Mahipal Singh Makrana-i, “Rajput nungertemi kodanga tetsür dak teka mesangshir, ajisüaka nüngdak dang süra Lakshman-i Shurpanakha dak inyakba ama onoki Deepika daka inyaktsü,” ta ashi.
Ano külen Rajput telok nung lenir tain, Lokendra Singh Kalvi-i December 1 nü linük tesem ajak mokdangtsü ta metetdaktsüogo.
Kalvi-i, “Onok nisung lakh aika adenshitsü, ozü tetsü-tebou nungertemi putiotsüji azü agi zülu. Onoki shinga nema ibaji tenüng memenükdaktsütsü. Onoki December 1 nü India ajak mokdangtsü ayongzükogo,” ta ashi.
Meerut nung amenoka aliba Thakur lenir, Thakur Abhishek Som-ia Deepika tepseter em sen crore 5 agütsütsü ta sangdongogo.
Item amokmeren dak sendakba nung Deepika-i, “Iba ama tensa ka nung, tetsür ka ama, artist ka ama aser linük senso ka ama ni jashir. Ni kodanga metsübutsü. Kü dak tetsübu shisatsü mali,” ta ashi.
“Iba film mereprangdangi pei tebilemba jembitsü atema nisungtem nem temelaba agütsüogo. Iba film nung ni shilem agia lir, anungji ni iba ya shiteter, iba film ya India nunger ajak nüma tangtettsü film ka lir. Onoki Padmavati-i ajangshiba sayar, aser iba atemaji ni pelar. La taküm otsüji iba linük nüburtem dang ang masü saka alima ajaklen metetdaktsütsü nüngdaker” ta laisa ashi.