KÜLEM KANGKI – 1 Korinth 1:10-18

Aser aji agi Pai tsükchitepba tepseter, kangki ajanga temang ka nung anaji Tsüngrem den putepdaktsü. Efesa 2:16
Asenok Khristan telungjem indang jembia aruogo. Asenok ano mera ana shisadanga iba onük tatembangi arudi.
Khrista kangkiji teyongtsü südakjang
Yihuda nunger aser Yihuda nunger masüba lungjemtetra, Khristantem telok balala tsüngda telungjem akatsübaji takoktsü. Yihuda nunger aser Yihuda nunger masüba pur dang azüa jaa meputepi liasü. Messiai Bendangertem dang Yihuda nunger akümtsü ajatsü ta Yihuda nungeri bilem. Saka Pai kangkiji teyong nung yur idakji telok anaji ajuruteptsü aja. Tetsükchitepji kangki ajanga tepset. Tiyong aliba tenokdangba jaraji raksatsü (Efesa 2:14-16).
Kangkiji jungtepshiba tamaitsü noksa lir. Metongmetonga noktakba ajok jagi nisunger Tsüngrem den jungtepshiba sayur; aser lenden jok jagi pei kiyonger den jungtepshiba sayur. Kati ka dangi anir aser ka medeni ka alitsü makok. “Kodang nisung lemangtemi Kibuba peladaktsür, Pai par tsükchirtema Pa den yimjung nung yutsür” (A.S. 16:7; 1 Yn. 4:20-21). Asenoki asen tebilemba tushidang nungi kangki nung asükümdi. Kodang kangki ajungketdir, tepuatsü aliba ajak samar aser ajak kangki akhüm küboki arur. Kodang kangki nung ranglokdir tasü tait küma sayutsüngir mesüra tanishir ajak samar (1 Korint 1:12-13).
Tanela Temeshi asentenshi asoshi sarasademang
Asentenshiba nungi adokba teret takong tashi tait army telok ka akümba mangdangji odang akümba masü. Tsüngremi mechi ana Yihuda aser par medemer aser Yosef aser pa adianu ka-ka küma medentepdaktsüba sayatenya mapa inyak. Pai ashi, “Aser na, nisung chir, nai mechi ka ammang, aser iba manung züluang, Yihuda aser pa medemertem Israel chirtem asoshi: ajiser mechi tanga ka agiang aser iba manung züluang, Yosef asoshi Efraim mechi aser pa medemer Israel kidong ajak asoshi… Aser ni parnok Israel tenem manung kin ka kümdaktsütsü aser parnok ajak asoshi chuba ka alitsü aser joko kin ana masütsü, mesüra joko kecha parnok chuba yimli ana malitsü” (Ezk. 37:16-22).
Pentecost nungi kasaji adok. Aser tamanger ajak külemi ali. Parnok ajaki temulung ka sür ola adoka Tsüngrem dang ashi” (T.M. 2:44; 4:24,32).
O Tsüngrem, Ne dak amangba purtem alima lungjema alitsü Ne Tanela süngjangtem onok rongnung adokdakjangma. Amen.

You must be logged in to post a comment Login