Kumlong ward nung lenirtemi NH 702-D junga yanglutsü mepishi

Kumlong ward nung lenirtemi NH 702-D junga yanglutsü mepishi

Tang Mokokchung district nung teyangludak lenmang- National Highway 702-D dak sendakba nung Aenjeti 13, 2018 nü Kumlong Ward, Mokokchung nung PWD (NH), Mokokchung division ketdangsertem, Vertex Construction nungi contractors aser Kumlong Ward Yimden aser Kumlong Lanur Telongjem nungi lenirtem senden ka amenba sülen tangokba noksa nung angur.

Mokokchung, Aenjeti (January) 13 (TYO): Kumlong Ward Yimden (Council) aser Kumlong Lanur Telongjem (Kumlong Youth Organization)-i kiyong nung yimdong tiyong ajangba gari lenmang, National Highway 702-D yangluba atema Nagaland PWD (National Highways) aser Vertex Construction na dang pelar, ta tanü Kumlong Ward Yimten tongti tezülur, Masasosang Jamir aser Kumlong Lanur Telongjem repsem zülur, Limasashi Longchar nati sangdong ka ajanga metetdaktsü.
National Highway 702-D (Mariani-Mokokchung road), ya Mokokchung aser temeket district tem rongsenkettsüng atema kanga tongtibang lenmang ka lir, aser iba lenmang ya küm aika kanga mejungi liasü, ajisüaka tawa iba lenmang yanglu tenzükba ajanga kiyongertem aser truck amshirtem kanga anisüngzüker, ta sangdong nung shia lir.
Iba lenmang ya kiyongertem aser nüburtem atema kanga tongtibang, ta tangatetba nung Kumlong Ward Yimden aser Kumlong Lanur Telongjem-i PWD (NH) officials aser Vertex Construction nungi contractors- Atoka aser Bendang nunger den Aenjeti 13, 2017 nü senden ka amen, aser iba mapang nung kiyongertem taginüba lemsatepa liasü.
PWD (NH) Executive Engineer, Er Chubatoshi leniba nung ketdangsertem aser Vertex Construction nungi contractors – Atoka aser Bendang nunger iba senden nung aden.
Kumlong nung alirtemi department aser Vertex Construction-i iba lenmang yangluba atema pelaba metetdaktsüba den külemi parnok dang iba lenmang ya sorkari lateta aliba ama shidak inyaktsü mepishia metetdaktsü.
Kiyong ajanga senzüba NH 702-D nung truck kanga senzüba ajanga iba lenmang kanga mejungi raksar liasü, ajisüaka tang iba lenmang yangluba ajanga kiyong tebor tajungba akumtsü, iba den külemi gari nung senzürtem, talisa truck amshirtem kanga anisüngzüktsü, ta parnokisa ashi. Kumlong Yimden aser KLT-isa mapa inyakertem den amalitepa yariteptsü, ta metetdaktsü.

You must be logged in to post a comment Login