Kümzükba asoshi tenüngsang

“Saka shibai ammang nungi pei tesüngmangtsü tesangwa dangi nenok aja, nenokia pa tajungtiba jungkai adokdaktsütsü asoshi nenok temeshitetba kin, chuba putir telok temeshi kin aser Tsüngrem pei agitsü nüburtemji nenok lir.” – 1 Peter 2:9
Tsüngrem nem tenüngsang agütsüba ajanga asen nem temoatsü bendenloktsüba tali jangjadaktsür. Kodang asenoki pa nem tenüngsang agütsüdir idangji pai pa chirtem ta asenok agizüker aser pai temeim tekümzükba agütsür, Tsüngrem nem tenüngsang magütsütetba ajanga pa den telongjem toktsür aser pa temeim tekümzükba nungi adokadoker.
Pa nem asenoki tenüngsang agütsüba ajanga asenok moatsüba dang masü saka tenüngsang jagi Tsüngrem memetetba pur dang kuli asüba ain tashi tulu atokdaktsür. Ano tenüngsang agütsüba nungi Tsüngremi tesüngmangtsü mapa tulu inyaker. Kodang Yihusua aser pa den aliba neburtemi takok agütsüba ola tulu agi ayimtena tenüng asang Yeriko yimti jara lao, kodang Paul aser Silai ayaterm nung Tsüngrem dang sarasadema pa nüngsang ken aten idangyongjisa tepuokdak kishi lapokadok.
Tsüngrem nem tenüngsang agütsüba ajanga tepela, temoatsü anisüngzük bener arutsüba dang masü saka tekümzükba agütsür.
Sarasadem : Ni kümzükba asoshi ni ne nem tenüngsang tulu agütsür. Amen