L. Doulo tepsettsü merangba aitsür: ACAUT

Dimapur, September 21 (TYO): Dimapur nung tongtibang nisung aser shishilembar tain, L Doulo, NSCN (K) nungi nisung tamajungertemi tepsettsü merang, ta osang angashia ACAUT Nagaland aoksar aser senso tajungtem amokmerenbaji ACAUT Nagaland-i sashia aitsür, ta tanü Media cell ACAUT Nagaland-i sangdong ka ajanga metetdaktsü.
“L.Doulo tepsettsü merangba ken o nung NSCN(K)-i Naga nungertem dang iba osang jangjashitsütsü ACAUT Nagaland-i akhanger. L. Doulo taküm agitsü merangba ken o nung tang tashi nunga NSCN (K) lenirtemi kecha maitsüba mesüra tesüiba küm pezü tsüngda Dimapur aser temeket nung bomb pokdaktsüba mesüra grenade pokdaktsüba tatalokbatem maitsübaji kanga tia maka,” ta ACAUT Nagaland-isa metetdaktsü.
NSCN (K)-i ola madokbaji ajanga tai maketba nüburtem anema inyakba mapatemji nungiter ama reprangteter, ta sangdong nungsa shia lir.
Iba ken o ya police-i jungjunga bushisüngdanga aibelenertem aputsü atema mepishir, ta ACAUT Nagaland-isa mepishia metetdaktsü.

You must be logged in to post a comment Login