Lanurtemi Alokba dang asen oshi nung aliba shin o khar metetnüa asüngdanger

Lanur : Tsükpo anüngjen ngur posü tokolak müner ta asüba ya kechi tetezü?
Alok : NPF telok ana lemdanger penjatepba ngua governorba mangmangdaktsüba adi.
Lanur : Meja tsükbener, Posü tsükdok shimer ta asüba ya a kechi tetezü?
Alok : Anogoshia yi ji belensa belener, gate nung pungdang khar merepdokba posütemi shidenba adishia jimbirba dangar.
Lanur : Shitsü münüjar, pongzü mujok neter ta asüba ya kechia ta asürba?
Alok : Centre-i sanctionji monü ajashir ama yoker, saka asen state government-i ajemsaba adi.
Lanur : Shirong alitsü melena shitsük alet ta asüba tetezü kechi?
Alok : Ketdangsertemi sanction ajak chimar parnok pua alettsü melen mokokminer tem ita shia jang seret ter ngua aliba anener tzü tatsük agi alet ama kangshitepba adishiba dang ago.
Lanur : Ango alangdang, Akong mesükdang ta denshiba ken tetezü kechi?
Alok : Taoba ita government jireper lia Dimapur nunga apu jirepa adishia adenba ken adi.
Lanur : An molukbang nung atem ama ta asüba tetezü ya kechi ama asüba dang ashir?
Alok : Yi ayokertem khen puteter tanaben yokra kiyong nungi aridoktsü ta meteta ozüng liaka tashi mangaba agi puteta kiyong nungi aridokba aser ano yilartem arishi lepdoker, ta meteta liaka tali ang jemer arishi lepdokba adishiba adi.
Lanur : Chi o chi-na adongtep, mulok o mulok-na septep ta jembiba tetezü ya shidangang jong…
Alok : Wha! Aji kela asen state government nung NPF dang telok ana septeper anogoshia penjatepba ya adi.
Hai lanurtem, joko ojang dang asüngdangang. Ni clean election atema mapa olura lir.
Lanur : Süra tatem nung ka asüngdangdi. Engraji oshi nungbo shin o ya aika dang lir. Item nungji ka dang asüngdangdi. Nai tetezü aser teratet abensa shiang. “Failure is the pillar of success”
Alok : Mokokchung jila police point nung apu yanglutsü atema tongshi ana azünga yur joko Silver jubilee tongdi ta asür. Süra takokbaji makokba tongshi ta asen oshi agi meyiper adi.
Lanur : Engraji shin o bo kanga junga meyipzüktsüogo. Ha!ha!ha!

Lilir : A.Maong Aier, Alongmen Ward Mkg.

You must be logged in to post a comment Login