Lapangi Congress MLA tem amokmeren

Shillong, September 13 (Agencies): BJP national tir Amit Shah-i state semdangtsüba anogo ishika lia Meghalaya Pradesh Congress Committee (MPCC) tir, DD Lapang-i Congress MLA tem shirnok Shah ajurutsü asoshi sentong lir parnok dang pa den majuruteptsü asoshi ozüng tesashi ka agütsüogo.
“MLA shirnok Shah den ajuruteptir parnok anema party-i tapet temerenshi agütsütsü. Onoki party anema aposuba MLA tem merenshitsü asoshi kecha atidaka malitsü,” ta Mongolbarnü osangbenertem den jembidang Lapang-i ashi.
Paisa ashiba agi, party MLA temi BJP national tir den majuruteptsüla
Kasa mapang nung taoba Chief Minister-isa ashiba agi, pa 2018 Assembly election nung tatembangbuba tokteptsü.
“Tang tashinungbo kü den tetokteper tashi taittibaji UDP MDC, Rona Khymdeit lir, saka election madong tsüngda tanga candidate aika adoktsü,” ta arishi küm 84 tain yimsüsüri ashi.
Yimden yimsüsüba nung küm 45 tashi shilem agia arur Lapang-i iba ya pa asoshi tatembangbuba election asütsü ta sangdongogo. “Ni akoktsü imlar aser ano küm pongu asoshi neburtem tenzüker iba mapa nungi anener,” ta paisa ashi.
MPCC tir ya Nongpoh nungi mezüngbuba 1972 küm independent candidate ka ama election nung tokteba MLA aküm.
Pa 1993 küm khen tamakok ngua lir. Pai Meghalaya nung pezüben tashi Chief Minister mapa benogo. Lapang 1992 mezüng CM aküm aser iba sülen 2003 aser 2007 nung ano CM menden abentsü asoshi shim. Pa May 13, 2009 küm pezübenbuba CM aküm.

You must be logged in to post a comment Login