Lebanese Ato Kilonser mapa nungi anen

Beirut, November 4 (Agencies): Lebanes Ato Kilonser Saad al-Hariri Honibarnü mapa nungi anenogo.
Television ajanga osang agütsüba nung pai ashiba agi, pai pa taküm lendong nung aliba lazükogo, aser iba dak sendakba nung pai Iran aser Lebanon nung parnok pusemba telok Hezbollah pur aitsüogo.
“Asenok dang Rafik al-Hariri (pa tebu, taoba Ato Kilonser) metepset tsüngda lia aliba tensa kasa nung lir. Ni ni tepsettsüba atema tasa asaaba lazükogo,” ta pai ashi.
Hariri-isa ashiba agi, Arab lima inyakyim balala nung Iran-i teka amooka inyakba tajemba küma odar. Paisa ashiba agi, Taoba mapang nung ama Lebanon-bo maneni temaleni atutsü aser iba nung tebilemba tamajung nung teka amoshirtem teka lepdoktsütsü.
Yaküm yimden yimsüsüba tsütsü tenangzüktepba ka yangluba sülen Hariri Lebanon Ato Kilonser aküm. Kasa tenangzüktepba ajanga Hezbollah den sendaka aliba Michel Aoun tir kümdaktsü.
Hezbollah ya yimden yimsüsübaren nung Lebanon kübok lir, saka parnok Iran den tesendaktep aliba, aser parnpki Syria tir Bashar al-Assad pusemba atema Lebanon nunger mepelar.
Hariri-i Saudi Arabia semdangogo, shirnok yimden yimsüsüba tsütsü Iran aser Hezbollah den tsükchir lir. Pai taoba hopta ana tsüngda nung Crown Prince Mohammed bin Salman aser tanga ketdangsertem den ajurutepogo.
Iba osang ya Beirut nung amendaker aliba al-Jadeed television ajanga agütsü aser Saudi yimtiba Riyadh nungi broadcast asü.

You must be logged in to post a comment Login