Lemtamarar – Matamabensartem dang meima benshitsüla

~ L. Kika  Pongener  Aoyimküm, Dimapur.

Taoba ita ishika tejaklen Tir Yimyim olemsabang nung Lemtamarar- matamabensartem asoshi centre sorkar nungi teyari yokba sen ” Inclusive Education for the Disabled at the Secondary stage.” (IEDSS) 2011-12 & 2012-13 küm indang sen crorer 12.79 education Department-i ochi mashi amshiogo ta temulong malem, ibaji shidak asü masü-ar tejangja kuli bushitsüngdangtsü atema Vigilance Department kupok Special Investigation Team (SIT) ka shimer nungloktsü sernung mapang shidak nung tim teinyaktsü meinyak-a ta, ibala ken o dak sendakba nung ashishitepa asen lima nubur meimertem tashir-temeteter aikati pei pei tebilemba zülutepogo, ashiko education department jagi senotsüji ochi mashi amshir ali asü masüar ibala kuli tejangjabajibo bushitsüngdangba teloki osang kodang tejangja agutsüdir idangjiang metetsü. Ajisüaka jembia angashiba aser zülutepba amaji ochimashi amshia lira, Tsüngrem aser nubur tsüngdang sentsüh tulu asütsü aser pei pei kibong taküm asoshia shir ketdangsertem lir khuret tulu asütsü. Ano 27th March’ 2015 adok Nagaland Post nung, “State’s disabled persons largely neglected,” ta ser adok. Iba article nung ano tesasatsü kaji “District Disability Rehabilitation Centre (DDRC) Civil Hospital Campus, the only one of its kind in the state has been non-operational since February 2013, showing a total negligence on the part of government towards the disabled person in the state, ta shia angur.” Iba article den külemi menentoka aliba Hospital ki “Defunct building of District Disability Rehabilitation Centre ” ta ser noksa tejangja sayua adoktsüogo. Ibaji-a zülua adoktsüba amaji shidak senzüka tokja lira, ibaji asen Nagaland sorkar tamakok aser tim teinyaktsü wadang tuluka sentoka toktsüba asütsü, aser ajioda Tsüngrem aser nubur matsüngdang sentsüh tulu asütsü.
Akhi tejen putu mapang nungbo item matamabensartem ya jentoka entok nübu ka ama züngshia aru, aser tangaribo oda toktsür tsürabur tetsü tasola aser tebuia sünga pei chir-a ta mesünüi tangar dang nüma-matang shiruru ka ama senzüka tokja lia aruba aika ajangshia aruogo, ajisuaka joko tanü tashitemetet putu nungbo item matamabensartem ya kangasa jenjang keta züngoka amshir aser parnok tang ya joko “Matamabensartem”(Disabled person)ta masü saka “Balaka alakteta inyaktsü akokertem ” (Differently- abled person) ta-ang ajar, kechiba sura parnok tenük-telen mabensa sernung tenuk-telen abensaa alirtemi meinyaktetba mapa aika koka inyakteter. Tanü putu nung joko sorkar mapa nunga handicapped atema percentage balaka wazüka toktsür, Hospital aser School-tem nung ayaketa atutsüba step nunga tsüngtsük-longtsükertem talungtsü jajatsü atema lenmang balaka yanglutsütsü sorkar sentong nung tongtipangsa inoker inyaker.
Aeroplane, train aser bus nunga parnok atema seat balaka wazüka (Reservation) toktsür. Aser ano alima ajungai item matamabensartem ya kangasa jenjang keta züngshia amshir-a ta kuli tejangja ka angubaji, parnok atema temeja Olympic asaya ayongzüka kaatsür.Iba jagi parnok ya kangasa jenjang tulu nung züngoka lir ta kuli sayur. Ajioda, tangar hindu -muslim aser limapurtem lima nungbo parnoka mesentoki züngshia anepalur, ajisüaka asen Naga lima ama Khristan noklang nung noklang aliba lima ka nung kechiba jenjang makai senzüka toktsütsü ??? Aser kechiba parnok atema teyari yokba senotsü ochi mashi ketdang asütsü ??? Kechiba parnok asoshi ketdangsda inyaktsüba office aser parnok anepaluba hospital menentoka toktsütsü ???
Asenoki küm aika item matamabensartem ya kecha jenjang maka anepalu mesüi senzüka tokja lia aruogo, ajisüaka alima tejakleni aoba den nüburtem tangatetba shisatsü nung ainba ajanga tanubo lenirtem aika mulongjang nung Tsüngremi jembia Prodigals Home Ministry, Living Bread Ministry , Dumb and Deaf School aser Blind school amala Ministry ajanga item matamabensartem bendena anepalur,parnok nema azüngtsü zülutsü angazükdaktsür, parnoka mesentoki anidena counselling aguja temulong meyipdakja tanela nung anitetba aser arogo den tongtepratepa tzü nung baptidakja arogo nung züngsem tajung kaka kümdaktsür aser mapang shia parnok nungdem nung sentong tajung yanglua ayongzüka akar aser parnok nema pei akokba shilem agidaktsür aser ano ajidang masü parnok ajunga nem senpet tajung renema agütsür. Anungji item ama mapa tajung inyakba angudang kangasa pelaseta temulong chia repranger. Aji oda, item mapa tajung asoshi nüburtemi lenirtem tenzükertem shirnoki nübo,mapang aser rongsen intok mesasai bendanga aguja inyaker parnok nem tenüngsang agütsütsüla aser nübo,shisatsü aser rongsen agia nungita yariteptsüla.
Ao Mungdang (ABAM)-ia iba ya tanela anir aruba nung shilem tulutiba rongnung ka ta angateta taoba küm ka ana tejaklen nungi küm shia ABAM Calendar nung item matamabensartem asoshi deobar anogo ka shiteta inoker sentong tajung yanglua parnok asoshi balaka bendanga aguja sarasadem sentep arogotem ajak nung monga aruba ya mapa tajung ka lir. Taküm 2015 küma 6th December deobar anogo nungji Differently Abled Person Sunday ta ser inoka lir, hau arogo aikati nendaka temulong agüja sentong tajung yanglur amongba ngua pelar, ajisüaka arogo aika nung iba sentong ya tongtipang ama mebilemi senzüka toktsüba angur. Kokrabang iba anogo nung ya pei pei arogo nung aliba matamabensartem ajunga ayongdena anidener senpet tajung renemtsür parnok atema balaka bendanga aguja sarasadem agutsütsüla aser parnok nema pei pei akokba shilem agidaktsütsüla. Ajioda iba ya arogo nung kangasa tongtipang teinyaktsü mapa ka ta amangba pur ajak nem angatetdaktsüner, Tongtipangsa arogotem nung sannükeri anir arogo lenirtemi kangasa nendaka inyaktsü ajungshir.
Arogotem aikati asen lima adena orr tangar lima nung tangar jala-jabasotem asoshi school aser training centre jenti lapoka rongsen jenti lalua mission mapa inyaktepdagi, hau ajia inyaktsü kanga tongtipang. Ajisüaka ano asen atepzüng nung asen tenüki ngua samaa aliba santem itemla lemtamarar-matamabensartem anepalutsüba ya khen meyipa reprangtsü mapang tongja tongogo aser arogotemi item matamabensartem asoshi sarasademtsüba kija masü saka parnok atema arogo shiai budget nung inoka teyari lenmang kar danga lapoka toktsütsü kangasa nüngdaka kümogo ta reprangteter. Tatishitsü ka, asenoki matamabensar nisung ka ajurur kanga aria bilema Tsüngremi moajang nii… ta nemeta sarasademtsür odang toktsüba kija agibo teperi masü,ajisüaka pa/la nemji nai akokba tachi-tajemtsü mesüra aben-suoshi pa/la kanga nüngdakba kar agi yarira ibajiang tali temoatsüba asütsü.
Asenoki zübazüba senzüka toktsür tang ashi, item matamabensartem asoshi tim teinyaktsü meinyak aser tim tereprangtsüyim mereprangi senzüka toktsüra asenok Tsüngrem tsüngdang sentsüh aser khuret tulu ta metetdi. Aser ano tongtipangsa sorkar ketdangsertemi item matamabensartem ya kanga dang süoki ia züngoka anepalutsüla aser parnok asoshi lenmang balala nungi senotsü teyari bushia inyaktsüba dak alaka parnok nüngdem nung teyari aruba senotsü tim mesüi ketdangsüa amshira khuret tulu aser sentsüh tulu asütsü ta angatetdi. Ajioda, taküm küm nungibo arogotem ajaki item matamabensartem asoshi calendar nung aliba ama kanga tang retreta nendak-nendaka sentong tajung yanglur amongtsü ayongzüker.