Lenmang majungba tia

Jangratemtsüka gari tajung aika lir saka tezüdangtsüka gari lenmang tatsüka ta tajung mali nübortem timtemdaktsüba limaji Nagaland lir. Nübortem asoshi ayuba public bus nung nisungtem ayongayonga jangratema mener senzütsü melen nisungtemang alii alur lishi mezüa bus atsür senzütsüsa akümba limaji Nagaland lir. Lenmangbo National aser State Highway saka arem nung shiruru senzüba lenmang mesükba lenmangji Nagaland nung angutsü. Item ama lenmangtem nungji taneptsü mengutet shiranger bener akushia senzürtemji Nagaland nung alir Naga nungertem lir. Iba amaji lenmangbo majung, gari totzübo kerosene den meyokteper enok aser tadongtsü ka atongdangbo gari telongbo ajak tsüksar atong saka teyanglutsü senbo maka ta timatemertemji asenok Nagaland nung alirtem lir. Ajisüaka, mozü chidaktsür anüalemdaktsü amato lenmang mejungaka mejashii tesem aika nung nübortemi dang tenla sarutepa state highway aser kiyong lenmang dang masü saka National Highway dena yanglushiba asenoki angur. Ashiko, alima nung National Highway ka nübortemi peisasa mulungtetter tenla sarutepa inyakba limajibo Nagaland dang asütsüa akok. Ibaji ken bilemtsübo government-i meyanglutsüba agi timtem marem nübortemi inyaker asünungji mapa tajung ka inyaker amai, saka shitakba nungbo ibaji temenünütsüka lir. Shitakba agibo, National aser State Highway meyanglushiba atema nübortemi government anema longkak aittsüla, kechiyong ibaji government mapa aser item ama tongtibang lenmang atemaji sen lemzükja lir. Ashiko, lenmang karbo kari sen agizüka chir lenmang meyanglu nübortem timtemdaktsür asütsüa akok mesüra karbo ketdangser tashimaitba agi meyanglushitetter asütsüa akok. Item kulitemji bushia tangbo nübortem karibo ola adok tenzükogo. Taoba mapangtem nunga tesem tesem nung nübortemi government dang gari lenmang yanglujang ta longkak aitba asenoki angashigo aser tanga Phek district nung Chozuba Range Taxi & Truck Union purtemi November 2 nungi zünga anogo metsünü tashi nung lenmang meyanglushitsüra lenmang nokdanga yur longkak aittsü ta metetdakja lir. Nisungtem anisüngzüka senzütsü asoshi dang masü saka alima topur jungdaktsübaji lenmang junga yangluba agi temenungratsüka topur junga kümdaktsür.Aji oda, asenoki kecha bendenloka meinyakyonga alima nung topur tajung asütsüba limaji Naga lima ya ka lir. Iba amaji Tsüngremibo yanglutsü saka asenoki ano tali topur tajungba kümdaktsütsü melen teraksa-ang kanga mejungi raksatsüogo. Ibayongji, asenok yimti aser office kimatem ajak naronü kümdakja süngdonglidong agi topur jungjunga kümdaktsütsü melen anogo shi nisungtem senzüdak aser mapa inyakdakbo memesük ayi, auyi aser lishi agi lenmanga mangu tesempakatsüka kümer angur. Tangarbo lenmang medemmedema yanglur külenang lenmang sema süngdong atemer aser tesem-tesem nung chiyonga ajemdak lendang semtu tajung yanglua nübortem tajangzük ngudaktsür. Tia kanga majung, asenok dakbo iba amaji nübortem anogo shia senzütsüba lemang indang bilemba shisatsü masü saka lenmang yanglutsü asoshi lemzükba senji kodaser mimzüka agizüka agir pei alitsü chuba kidanga tuluba asütsü ta dang bilemba shisatsü aser tekolokang dena lir. Iba jagi kibo sentsü ajak pranga tajung, süoshi tamajung agir kaotsülabo masü saka pei dena senzütsüba public lenmangbo lenmang masü. Iba lenmang nung tsünglu arunepbo, tetsüng agi keketrejui aor school tanurtembo nisung kari motzü seploktsüba agi süoshi ajak menener kidangi meyipa aotsüsa ataloker. Ano, karbo jungjunga renemer mapai aodang motzü temang sünga seploktsüba agi kidangi meyipa aotsüsa akümer. Asenok ochimashiba aser pei lima memeimba agi maksü timtem ajuruba otsütemji itemji lir. Nübortemi gari lenmang yanglushijang ta longkak aita amongtsü menüngdaker aser nübortem tenla agia National aser state high way yanglutsütsüa menüngdaker. Nübortem mapaji ozüng shitak benshitsü aser government nem tim teinyaktsü mapabo bushisüngdanga inyakdaktsütsü ta asütsüla. Shibai nübortemi ashi mangalir pajibo gvernnment nung malitsüsa dena nübortemi inyaktettsüla. Nübortem dak iba tashiji lir.