Leonardo DiCaprio-i lipoküm atema sen dollar million 20 nangzük

Los Angeles, September 20 (Agencies) : Actor Leonardo DiCaprio-i par Foundation-i lipoküm dak rangloker inyakertem telok 100 dak tema shi nem sen dollar million 20 teyari agütsütsü nangzükogo.
Iba teyari tasen ya, arem shiruru aser parnok aliba tesem wazüka ayutsü, aser tzü mopung melenshiba den raraa item telok rongsenkettsüng 1998 küm nungi aliba dang nungi sen million 80 agi tali kümdakja tashi taitba kümdaktütsü atema lir, ta osangbenertemi ashi.
“Iba tebilemtsütem ya küm aika alima nem metetdakja arur. Iba mapa ya asenok asoshi inyaker, asen planet asoshi aser asen tarutsü asoshi. Onoki meranga inyakba melen taa dalang angutsü aser nükjidonga tejangjaba akümer,” ta Mongulbarnü John Kerry-i ketdangsüa agiba sentong, Yale Climate Conference nung DiCaprio-i ashi.
“Item teinyakba tejangja liaka – scientific tsütsü nungi tekümdangtütem, aser kechisarena nung sen jenjang tasakba akümba ajak nguaka nüburtem shirnoki tuluka inyaktettsü tashi lir parnokia odang züzüa toktsür,” ta pai ashi.
DiCaprio-i, tan election nungbo lipoküm meimer lenirtem aser lipoküm mapa ya shitak ta bilemertem shimtsüla aser lipoküm meraksatsüsa amshitetba oset yangluba company tem nungittsüla,ta nüburtem ajungshi.
Oscar senpet angusang, DiCaprio-i, fossil fuels dak kecha memetaloki ‘renewable energy’ nung temulung agütsütsü ajungmeso.
“Onoki lenmang tasen kar bushiteta asen taküm tashi itshitsü, nisung million aika nem mapa inyaktsü maongka agütsütsü aser nisung shia mopung temerük aser tzü tajemtsü tajung ketdangsüa inyakteter kümdaktsütsü nükjidong lir. Yimsüsürtemi tzü mopung angateta kanga memunudang mera tesashi agia temelenshi bener arutsü akhanger,” ta paisa ashi.
Pai nangzükba sen ya shilem trok asoshi lir, climate change, wildlife & landscape conservation, marine life & ocean conservation, innovative solutions, indigenous rights, aser California programme.