Lepto tashitak ajanga Mumbai nübur aoksar, nisung 12 süogo

Mumbai, July 08 (Agencies): Tesüiba anogo tenetnü tsüngda Mumbai nung leptospirosis tashitak ajanga nisung 12 süogo, ta Mongolbar nü ketdangsertemi ashi. Arishi küm 12 tetsür chanu ka densema asürtem timbaka Goregaon aser Dahisar na tsüngda alirtem lir.

Bacteria tashitak, Leptospirosis ya tashitak aliba koya, azü mesüra kor natzü tzü atsünga aliba den meyoktepba nungi adoker. 2005 küm iba tashitak ajanga nisung 66 asü aser 2007 küm nunga nisung meyirjang aika iba tashitak ajanga shirangba den külemi nisung 79 süogo.

Taküm küm mongintem süngmangtepbaji iba tashitak ajanga shirangba aser asürtem züngdangbaji medemdangra kangasa majung- July 1 nungi 7 nü tashi nung shiranger 21 nungi nisung 12 süogo.

“Leptospirosis tashitak ya doxycycline ama antibiotic mozü ajanga mela-mela taneptsü angur, saka asürtemji kanga menor aruba ajanga hospital nung ghonda 24 tsüngda süogo,” ta BMC executive health officer Dr Padmaja Keskar-i ashi.

BMC nung epidemiology officer Dr Mini Khetarpal-i, asür 12 nungjagi parnok 8 bo tzü atsünga alidak senzüba kuli lir, ta ashi.

“Nija doctor 10,000 dak tema lir, aser iba tashitak agi shirangertemi parnok dangi aotsü. (Anungji) onoki iba tashitak indang parnok nem junga angatetdaktsütsü,” ta laisa ashi.

Nisung shirnok temang kanga metaba den tekolak menüba aser temang ayang-ashiba lir, parnoki leptospirosis tashitak tendangtsüla.

“Leptospirosis tashitak ya tzü atsünga aliba lenmang nung senzürtem dak timba adoker, saka iba tashitakji pei kiyong nung motzü alidak ajemshia senzürtem daka atongtsü. Leptospirosis tashitak ya kiset shiruru dak-a atonger, anungji tashitak keta aliba shiruru natzü ajanga iba tashitak proker,” ta BMC-i ketdangsüba Kasturba Hospital nung menatepba tashitak specialist, Dr Om Srivastava-i ashi.