Linük dang nungi auyadar ta Modi, Jaitley nati meteta liasü: Cong

New Delhi, Tsükali 17 (Agencies): Tanü Congress Party-i, Ato kilonser, Narendra Modi aser Union finance minister, Arun Jaitley napronglai Punjab National Bank (PNB) ashioktsüba ajanga linük dang nungi sen crore 11,000 auyadar, ta meteta liasü, ta aitsü.
Congress-isa, iba ochimashi ken o bushisüngdangtsü atema Modi-i tetuyuba agutsütsü asü?, ta asüngdang.
Congress lenir, Kapil Sibal-i, “Ato kilonser Modi-i kechiba pa official ainlen senzüdang pa den shirnoksa senzür, ibaji pai ashitsü memelunger? ‘Shishilembaba temelaba kümdaktsüba’ ta Ato kilonser Modi-i jembibaji iba ya asü?,” ta asüngdang.
“Official ainlen jajadang Ato kilonser den nija nisungtem rongnung corporates kar densema alir. Ni pa (Modi) Ato kilonser akumba sülen Nirav Modi-i kiojen kwi ali, aser sen kwi apo ? ta asüngdangener,” ta paisa ashi.
Ato kilonser Modi maneni aija Sibal-isa, “Nai (Modi) sorkar aser shishilembartem tesendaktep aliba ya institution ka kümdaktsüogo. Asen sen agi parnoki kiojentem alir, aser kodang parnok sentsüh tsühdir parnoki linük toktsür ajener,” ta aitsü.
Paisa BJP danga UPA sorkar yimsüsüba aser BJP yimsüsüba na tetsüngda shitettsü asü, ta ayongzük.
“Parnok nükjidong tamajung aliba ajanga parnoki linük rongsenkettsüng mejungi kümdaktsüogo. BJP-i 2G ji ochimashi ka lir ta jembitsüji aaktsüla. Parnoki linük rongsenkettsüng mejungi kümdaktsüba atema aaktsüla. IT, communication sector sentsüh aika lir,” ta Congress lenirisa metetdaktsü.
“Bank dak sendakba ochimashi tulu alidang PMO kechi repranga liasü? Linük meyong auyadar, ta Finance Ministry aser PMO-meteta liasü. Onoki indangindanga Ato kilonser aser finance minister na aitsür. Parnoki kecha mangu ama toktsü. Linük meyong auyadar ta tenati meteta liasü,” ta paisa metetdaktsü.
“Ato kilonser Modi, nai aibenertem anema meinyakra shibai India rongsenkettsüng nung tamang katettsü. Nüburtemi nü dak tamang makai kümogo, kobi melii nüburtemi India dak tamang makatsü,” ta paisa shisem.