Linük temzüng anema shimokba advisor/parliamentary secretary anema Nagaland Tribes Council ajanga high court nung ken o benok

– N.M Jamir, Advocate, Gauhati High Court.

Nagaland nung linük temzüngi (Constitution of India) memelaba taila Advisors aser Parliamentary Secretaries tem shimokba anema Nagaland Tribes Council (NTC) ajanga benokba Ken O Public Interest Litigation Gauhati High Court ajanga 18th September nung angadanger agizüka yuogo. Okatsur Senior S.Dutta aser Okatsur N.M Jamir nati angadanger külen, Tongti Obendanger Ajit Singh aser Obendanger Manojit Bhuyan nati Nagaland sorkar dang telangzüba hopta trok tsüngda nungsa meshia tetuyuba agütsüogo. Iba ken O ya 11th September anogo nung Gauhati High Court, Kohima Benchi angadanger külen Obendang agütsütsü atema Tongti Obendanger Ajit Singh dangi Guahati yoka liasü. NTC yimlar, mapang tetemsü nung Gauhati High Court ajanga Nagaland nung aliba Advisors aser Parliamentary Secretaries-tem ya linük temzüngi memelar aser katiatoktsü tetuyuba agütsütsü.
India nung tematiba Obendangdak (Supreme Court) ajanga 26th July, 2017 otsüsütsüsa obendangtsüba (Landmark Judgment) ka ajanga sangdongba agi, Parliamentary Secretaries tem ya ayutsu linük temzüngi memelar. Nagaland nung 2005 küm nungi Chief Minister temi Advisor aser Parliamentary Secretary-tem shimoka Sorkar ketdangser kümdaktsür, koba linük temzüng Arla 164 (1A) anema lir aser iba maparen ajanga Nagaland sorkar ketdangsürtem inyakyim ozüng (Nagaland Rules of Executive Business 1980) ajemrepa yutsür. Ano tongtipangsa linük temzüng ajanga Chief Ministeri kulizüng agitsü makok (administering oath of secrecy). Anungji, Nagaland Chief Minister TR Zeliangi 25th July anogo nung Advisor 9 (toku) aser Parliamentary Secretary 26 (metsüser terok) nem kulizüng agütsübaji ozüngi memelaba maparen aser linük temzüng anema lir.
India linük temzüng 91 buba yanglushiba (91st amendment) ajanga lemtetba agi, India nung Centre aser State Sorkartem nung Minister 15 % (out of total members of Lok Sabha & State Assembly) mesüra tajemba agi Minister 12 (terser ana) dang alitsüla. Iba telemtetba ajanga jangjajangja ashir, Nagaland Sorkar nung Minister 12 (terser ana) dang alitsüla ta tuyur. Iba linük temzüng tetuyuba ajanga 2005 küm nungibo Nagaland Sorkar nunga Minister 12 (terser ana) dang shimoker, sakasa linük temzüng anema Chief Ministertemi Advisor aser Parliamentary tem shimoker aser Sorkar ketdangser Minister jenjang nung achaayanga yimsü südaktsür. Linük temzüng anema shimokba Advisors/Parliamentary Secretaries tem yagi Sorkar senpong nung nüngdak makaba aser tim mesüi sen aika lalushipongdaktsür.