Lipoküm wazüka ayutsü libaliroyim

~   Toshi Sanglir, Youth Secretary.

Asen North East lima nung tanü asüng tsüngsang mopung kanga melena akümba ya o lemtep aika nung tongtibang onük ka kümogo. Scientists temi menoknok tuluka arutsü ta ashibaya (predict) tebilemtsü ka lir. University of Colorado nung seismologist ka tenüng agi Roger Bilham i ashiba agi, asen North East nung menoknok tulu ka (8.0 richter scale) arutsü lir.
Yaküm Nepal nung menoknok agi alima nung teraksa jenti atalokogo aser meimchir jenti taküm samaogo. Saka North East nung arutsüba menoknokji tamajungba asütsü ta ashir.
Nagaland newspaper-tem nung osang aika iba dak sendakba o ratet aika aseni angur. Tsüngsang mopung agi alima raksaba ya, asen Aolima nung tawa May 1, 2016 yipru agi süngdonglidong aser ki aika raksatsüba asenoki nguogo. Ano, tawa Assam nung tzümetsüng aser Nagaland nung anentsüh anenba (landslide) agi nüburtem timtemba ya kanga tebilemtsü ka lir. Assam nung nisung 92,000 shi kongshiba tzümetsüng agi talidak makai kümdaktsüogo. Iba ya Sivasagar, Charaideo, J orhat, Tinsukia, Dibrugarh aser Cachar districts nung lir. Newspaper nung ashiba agi, Kaziranga National Park shilem 80% tzü agi mobangogo. Arem shiruru aika taküm samaba den iba Park anasa alir aika talidak makai kümogo. Ano, Arunachal Pradesh nunga nisung 19 anentsüh agi taküm agiogo. Item ajak ya yiprumopung aser tsüngsang mopung melenshiba ajanga atalokba lir ta shiteter. Mon district nung ki 200 shi anentsüh agi raksatsü. Item tatalokba ajanga asenoki climate change aser environmental protection atema kanga tongtibangsa memenui inyaktsüla.
Tawa tsüngsang mopung melenshiba ya tarutsü nung kechi arutsü, aji sayurba dang lir ta environmentalist temi ashir. Aikati tsüngsang kanga balaka (unusual) melenshiogo ta ashir. Saka, tawa tsüngsang mopung ya kecha balaka memelenshi. Talangka nungi climate change ajanga tsüngsang mopung (weather) ya melenshitsü ta environmental scientist temi shir liasü, Anentsüh, tzümetsüng aser tsüngsarusatem ajanga climate change ataloktsü ta shina liasü. Iba ajanga, alu nung tzünutsü junga madoktsü aser alima nung chiyongtsü agi meperitsü, iba yagi (displacement of people) nisungtem pei lima nung talidak makai nemzütsü. Alima nung libaliro temelenshi tajungba bushidang meimchitemi süngdonglidong aika lepdokogo. Iba ya ajanga asenoki carbondioxide jenti yanglur aser greenhouse gas aika mopung nung yoker.
Scientist temi mapang talangka nungi shina yutsüba ama; tanü asenok aliba lima ya Meyi mapang tatsükba maneni akümtsü aser yamaji asükwa nung temokongba akümtsü. Ano
ali tekong tesem aika tzü agi mobangtsü aser ali tesem aika nung tzü agi anunga akümtsü. Item tatalokba aj ak yagi meimchir aser aluyimba nung tamakok angutsü. Asenok asoshi tatishitsü anasatibaji; Bangladesh koba lima nung ali tekong tesem aika tzü agi mobanga akümer. Aser meimchir aika ali tesem bushia pokyimdang talidak makai senzütsü. Iba ya ajanga nisung libaliroyim nung tebilemtsü aika bener arutsütsü. Iba yagi asenoki lipoküm wazüba ayutsü kanga tongtibang ta angateter.
Rio de Janeiro nung mezüngbuba UN Conference on Environment & Development 1992, nungi tang tatemsa akaba Paris Agreement 2015 nung tezüngzüktep aika agiogo. Tatemsa akaba tangatetep nung linuk 195-i alima temperature 2°C kübok ayutsü telemtet agiogo. Iba ya ajanga, science-i agütsüba shisatsü tajungtiba amshia alima temperature bener alutsü ta govemment temi merangtsü ta agizük, Mezüngbuba (agreement) tangatettep koba dang “Framework Convention on Climate Change” (FCCA) ta ajar, carbondioxide tali mekümdaktsütsü atema tasa bushia liasü, iba sulen adokba tangatettep, koba dang Kyoto Protocol ta ajar; * greenhouse gas (iba yagi alima tatsük kümdaktsür. Document tatem nung ya tatsü agi rasaa lir) tajemba kümdaktsütsü atema shilem agia adenba linüktem nungi takangba liasü.
Industrialized linuk timbakati 1990 nung nangzükba ama greenhouse gas ji 6% – 8% tashi dang 2008-2012 nung ayutsü ta nangzüka liasü. Saka (developed aser developing countries) developed linüktem o developing linuktem tsüngda pei pei nangzükba greenhouse gas ajema ayutsü meyuteti aküm.
Tang tashi iba ama o jembiba nung tongtibang otem kar item ya lir. Carbon dioxide aser greenhouse gas ajemtsüba, green technology yanglutsüba, linuk kümzüka ayutsü tangatettep otem aser best practices lemsaa amshitsü. Item ajak liaka, govemment balalai tongtibang nukjidongji, alima temperature 2°C agi temokongba akümtsü lenmang bushiba asütsü.
Tenangzükbatem aika liaka, linük balala pei jenjang ajungketnüdang greenhouse gas ajema ayutsü mekokteti akümer. Saka asen alima Tsüngremi asen dang rizünga yuang ta ashiba inyaktsü süra asen libaliro aser inyakyim nung temelenshi alitsüla. Asen rongsen bushiba yimya aser lokti nükla nung teme1enshiji ajaki inyaktettsü tim. Item tezüngzüktep aika liaka asen lima nung temelenshiji, United Nation aser govemment temi bener marutsü. Kija aser loktii teinyaktsü jenti lir aser aji inyakyim tila nung tenzüktettsü. Lipok 1 :31 nung Tsüngremi alima yanglu aser Pai aji junger ta Pai angu. Pai alima ngua pela saka ali reprangtsü shinga mali nung (Lipok 2: 5) Pai nisung ka yanglu aser Eden nung yutsü (Lipok 2:15). Asen tang tasüngdangba kaji Tsüngremi pela-a yangluba alima asenoki koma anepalua ayutsü? Asenok environmental stewardship
inyakyim item ya yuteta amshitetra Tsüngremi agütsüba alima ya tobur junga yutettsü.
1. Küm 5 tsüngda lokti tentet balala ajak nung green energy inyakyim, amshiyim aser sentong lemsateptsüla.
2. Government aser public ki ajak nung tajemba agi 75% solar aser renewal energy light amshitsüla.
3. City taxi, auto rickshaw aser school bus nung battery power mesüra cng amshitsüla. (Gari küm 5 aser tema alir atema) Gari nungi mokozü nokdangba dang masü, gari para (reduced fare) ajema akümtsü. Iba ya ajanga nüburtem ajangzüktsüi. Iba “green transportation” ozüng ya city zone ajak nung amshitsü.
4. Commercial gari ajak iba “green transportation” policy nung adener atema 60% green tax reduction küm 5 atema alitsüla.
5. Renewable energy ayoker aser yanglur ajak govemment-i “green credit” agütsütsüla. Iba green credit ajanga commercial tax tajemba akümtsü.
8. Green technology and innovation azünger atema scholarship agütsütsüla, Iba ya city, town aser yimtsüng sentong den tapet education asütsüla.
9. Recycle aser upcycle technologies (paper aser plastic) promote asüba lokti/kija atema tapet “green credit” agütsütsüla, Local bodies aser institutions nem tapet training agüja yaritsüla.
8. Küm shia world environment day nung sentong atemba kisüng agi mapa matemtsü. Kija, lokti, colony aser zone wise i süngdongtem atemba tatsüba agi küm 7 anepalutstila aser junga inyakteter atema sempet agütsütsüla. Sentong tapu balala den süngjang atangba süngdong (fruit trees) atemtsüla. Ayadangbo plum/moteram chitetter, saka pine jangbo mechiteter!
9. Dokan ajak nung environmental friendly bags (bio- degradable) amshitsü ozüng alitsü, Plastic bag free zone zone wise enact asütsüla,
10. City/town aser yimtsüng ajak nung climate change aser greenhouse emission indang sentong tapet akatsüla. Environment program ya classroom nung 10% sayutsü aser kima nung 90% sayutsüla.
11. Yimtsüng aser town nung takok tashi sting ajema amshiba mimong (smokeless stove), anti agi tzü aser mopung talem kümdaktsüba (solar air and water heater) oset amshitsü sayutsüla.
12. Ki nungi adokba jana (waste from houses) indokyim tesayuba tapet agütsütsüla aser city/town municipal-i efficient waste management inyaktsüla. Kiyong/ward shia, ozüng tapet yanglua amshitsü kanga tongtibang. Industrial (workshops/hotels/factories) waste disposable atema local bodies temi municipal/town committee yaritsüla. Local communities (grass root bodies) nem tashi agütsüra takok angutsü.
13. Menüngdakba mapang nung light tsüklokba, fan on sür tang ayuba aser phone charger plug sur dang ayuba, yabo shitak masü. Menüngdakba mapang nung mamshi nung environment atema ajungtsü.
13. Asenoki osettsüset ya tanaben amshitsü (reuse) akok nungbo amshitsüla. Nai maginura nüngdaker kar nem agüjang. Nüngdak kangabo mali sernung sen akaba agi aliba ya ajem (reduce) nungbo environment atema ajungtsü. Asenoki takok tashi recyle süteterapangla inyaktsüla. Saka aji tamakoktsü sürabang, item osettem ji upcycle asütsüla. Tetezü, plastic bottle agi kioktsü aser naro tem yangluba.
13. Akok tashi lenmang talang mesürabangla tetsüng agi jajabaji environment atema tajung. Kija senzütsüsa süra cycle agi mapa aika akoktsü.
13. Tanur school-i aodang, kiyonger tanura anir aonungbo ajungtsü.
References:
1. “Historic Paris Agreement on Climate Change – 195 Nations Set Path to Keep Temperature Rise Well Below 2 Degrees Celsius”. UN Climate Change Newsroom. United Nations Framework Convention on Climate Change.
1. Cooper, Helene (November 14, 2009). “Leaders Will Delay Deal on Climate Change”. New York TImes.
1. http://ec.europa.eu/c/ima/policies/intemational/ negotiations/paris/index _en. htm
1. Climate Change 101,’ local action, Center for Climate and Energy Solutions. January 2011.