Lisopur Ola- IV: Ao kin dang otsü ka ashir !!

– N. M. Jamir, Advocate, Gauhati High Court.

Tanü India lima nung zünger sorkar mapa mangur (educated unemployed) aser peisasa mapa inyaka rongsenren nung nokdaktettsü atema (generation of employment for economic sustaintion) Ministry of Micro, Small & Medium Enterprises (MoMSME) ajanga sentong aser maparen tajung ka inyaka arudagi.Ibaji PRIME MINISTER’S EMPLOYMENT GENERATION PROGRAMME (PMEGP) lir. Iba PMEGP ya taoba mapang inyaka aruba PMRY aser REGP sentong na loktep aser aji oda 2009 nungibo PMEGP ta jatetta tajungba nung yanglushir inyaka arudagi. PMEGP nükjidongtemji ; (i) Yimtsüng aser jila tem nung maparen inyakyim tasen tapu balala inyakba ajanga lanurtem peisasa mapa inyaka senotsü ayangtsü maongka agütsütsü. (ii) Inyaksangshi maparen tapu balala metetta inyaktetter lanurtem nem rongsenren nung peisasa inyaka aotsü maongka agütsütsü.(iii) Yimdak yimtsüngtem nung mapa inyaksangshi tapu balala inyaktetter lanurtem jila (Town/City) temi mao pei telidak yimtsüng nung peisasa inyaktetba maparentem inyaka rongsenren nung tajangzük ngua inyaktsü lenmang sadema lapoktsütsü.(iv) Mapa meranga inyakteter aser nükla tajung aliba lanurtem senotsü timba ayangtsü lenmang lapoktsütsü.
Iba PMEGP sentong ya State-tem nung Directorate of Industries aser State Khadi & Village Industries Boards ajanga achaayanga inyaker aser Districts-tem nung District Industries Centres aser District KVIB ajanga tejangrar-tem atema application agizüker aser District Selection Board ajanga beneficiaries tem shimtetter. PMEGP sentong-ji Loan timtiba agi 25 Lakhs tashi agütsür aser aji 60 % Bank Loan, 35 % Govt. Subsidy aser 5 % Self investment lir.
Angazükba agi iba PMEGP sentong atema 2015-16 atema asen Mokokchung District nungi asen Ao lisopur mapa inyatsü jangrar parnok tetsür tebur terser pungu (15) District Selection Board ajanga shimtetter Loan agütsütsü atema parnok tenüngtem Axis Bank, Mokokchung Branch nem 02.06.2016 nung agütsü. Parnok mapa sentong (Project) temji Weaving, Stone Carving, Mechanised Furniture, Cutting & Tailoring, Electronic Repairing tem liasü. Saka tanü tashi parnok nem Axis Bank-i sen maputsür, anungji Deputy Commissioner, Mokokchung-i 13.07.2017 anogo nung shidi ajanga Axis Bank Branch Manager dang Sorkari shimtetter alir parnok terser pungu (15) nem PMEGP Loanji agüjang ta nenshia ashi. DC-isa ashiba agi, Loan-ji magütsüra iba jagi Sorkar sentong inyakyim nung tamakok asütsü. Saka 11.09.2017 anogo nung Axis Bank Mokokchung Branch Manager-bai shidi ajanga ashiba agi, tamalen PMEGP beneficiaries parnok terserti (18) nem sen 37 Lakhs aputsu saka parnoki sentsü (Loan) memeyiptsür aser iba ajanga Bank takoksa tulu nung lir, anungji 2015- 16 beneficiaries tem nem sen (Loan) ji maputsütetter.Iba ya ajanga asenoki angatter asen lima nungbo Central Flagship sentong tajung PMEGP amala takok ngua meinyaktetter. Iba kuliji Axis Banki ashiba ama, asenoki mapa aser nükjidong sayua Loan agir saka memeyiptsür (Recovery Nil). Süra kechi tangatetba nung Bank dang sen apur. Tanübo ayongayonga alitsu südi saka kenü Banki sen Recovery atema Debts Recovery Tribunal nung ken O benoktsü aser sen memeyiptsür tem lendongi aitsü aser tepuokdak (Jail) ayutsü.
PMEGP sentong ajanga lanur mapa inyakner aser rongsenren nung peisasa nokdaktetta litettsü pur nem Sorkari achaayanga Bank temi sen aputsur aser temalen ashiba ama, Govt. Subsidy-a dalang agütsür.Saka asenoki Loan dang agizüker senji tim masüba nung amshia PMEGP sentong matalokdaktsüra asen lima nungbo Central Flagship Prgramme kenyongi meinyaktettsü. Tanü India lima nung ochimashi merüktettsü Centre Sorkari mapatong aika atonga inyaka aoba asenoki angur.Ano asen North East tem nung terenlok jenti inyaka aotsü sentong aika lir aser iba atema Development of North East States (DoNER) Ministry ajanga maparen jenti sen Crore aika ketdangsüa inyakdagi. Anungji, item maongka tajungtem agitettsü asenok tangatetba melenshir renemshia alitsüla.
Asen tangatetba melenshidi aser amang agi anepdang kümdaktsüdi .Tsüngremi asen Aor moajangma.