LKM-i Tuli nung atalokba mapatem aitsür ; Candidate-temi nüburtem metendangtsü mepishir

Dimapur, Sept. 22 (TYO) : Taruba Nagaland general election dak sendakba maparen nung nisung kari Tuli nung kimen mesema, sen, injang prangpong amshiba aser ano tashiyim agi gari aser kiojen raksatsüba mapa ajungaji ‘Clean election’ agitsü tenangzükba mapatem anema lir, anungji kanga sashia aitsür ta Langpangkong Kaketshir Mongdang (LKM)-i metetdaktsüogo.
“Kaketshirtemi timtem khuret jenti agia nübortem den election timi agitsü asoshi shisalemsatepa senzüba mapang, gari aser kiojen tashi raksaa nübortem rongrongtsüsa atalokba ya LKM asoshi maksü aser tayongzükba khuret tuluka kümogo,” ta LKM-isa kanga sasaba osang ka metetdaktsü.
Tuli nung nisung ka kidang September 18, 2017 anogo nung Assam Rifles sepaitemi prangpong , injang aser bomb apuba aser September 19, 2017 anogo nung Tuli nungsa gari aser kiojen raksaja lendong timtem atalokba sülen, Langpangkong Tzükong Mongdang, LKM lenirtem aser LKM Clean Election Campaign Committee (LKMCECC) purtem September 21 nü Merangkong tashi oagi yangji yimten yimsüsür aser lanu menden nung tanishirtem ajurua ataloka aruba mapa aser tebilemtsütem indang kanga süoki ia jembia liasü.
Iba senden nung Tuli aser temeket nung Clean election tenangzükbatem menentsüsa ozüng anema kija aser teloki tashiyim agi inyakba mapatem ajak aija ken o lemtepba sülen, tang nungi arogo aser lokti tentettemi aser talisa LKMCECC leniba nung election timi agitsü asoshi nokdakba nung ochi agi pusema inyaktsü aser clean election tenangzükbatem meraksai mapa küma inyaktsü atema ken o akangshiba mapang agia liasü.
“Clean election indang tangatetba agüja Nagaland nung aser talisa Langpangkong nung election timi agitsü asoshi jembia nangzüktepba ya nübortem asoshi dang masü saka election-i aitsü pur candidate asoshia kanga tajangzük lir, kechiyong clean election aginüa ayimtenba ola yagi candidate-tem sen meindoki election nung tokteptsü lenmang sademsadema lapoktsür, anungji candidate-temi aji angatettsüla aser nübortem sen aser tashiyim mapa agi metendangdaktsüner,” ta LKMCECC-isa mepishia metetdaktsüogo.
“Ano külen, election mapang takok toktepdang, nübortem mesüzüktsü asoshi tatidang aruaka koktettsüsa nübortem dak tarutsü lanu putu asoshi bilemja tangatetba lidaktsüner,” ta LKMCECC-isa metetdaktsü.
“Tang Tuli nung atalokba mapatem yagi asenok tali sarasademtsüla aser mapa temerangba inyaktsüla ta nüngdak mapa ka nenshia metetdaktsür asütsü,” ta LKMCECC-isa metetdaktsü.
Ano maneni LKMCECC purtemi nüngdakba purtem ajurua kechisüdirsüaka election timi agitsü asoshi sarasadema shisalemsateptsü sentong atonga lir.