Lokti sendenia marur !

Tang ya Nagaland nung ochimashi mapatem anema lokti senden jazüka jembitsü pur lokti tentet kata mali kümogo. Assembly nung opposition mali aser nübortem rongnung lokti tentet shingaia ochimashi anema ola madoker ta ajak telongi irr ola madok kazütsüsa tensa tia ka yanglutetba ya tesüngmangtsüka lir. Tetezü ola madokertem ajakji ochimashi ajanga bener aruba tajangzük terarabo lemzüker alitsü. Atangji, asenok aika ochimashi lenmang len nungi mapai aiba ajanga kibong mesüa alir, ano tsüraburtem aika ochimashi len nungi aruba temoatsütem agi pei chirnur züngdaktsür. Aji oda, ano nisung aika mapai mao aser mapa meinyak angati ita sen agizüka agir. Ano, kibong aika ochimashisang dak dang metaloker alir. Ibayongji, meshitaka ta meteta lir saka ola madoktetter. Kena Naga nunger tia ajung, Nagaland nung ochimashi mapatem anema nokdaktsü asoshi ACAUT telok tenteta lir, iba jagiang nübortem shilem ajakbo bener moudaktsüi tera sota lir. Aji oda, ACAUT telok aliba ajanga dang Nagaland nung gari totzü shitak angur, government nungi jangotsü akhidang nungi tajungba angur, deparment karibo government mapa inyaknertem atema osangkaket nung mapa tazüng adokba indang advertisement khenkhenbo agütsür aser gari lenmanga terarabo yanglu tenzükogo. Ajisüaka, ochimashi mapatem anema ola adoktsü asoshi ACAUT telok amai lokti senden ayongzük dang asenok shinga maor kechiyong asenok pei mapa agi mazüng mesüra mebelemner saka kidangbo asenoki anir ochimashi mapatem anema ola adoktsüla aser ochimashi inyakertembo odangbo medoktsütsüla ta kanga sashia jembir. Iba jagi tanü Nagaland kangshidaktsür. Aji oda, ochimashi inyakertemi ochimashi mapatem anema nokdakertemang tepuokdaki yoker aser yimdong nung tzü agi ina arishir ta asüba putu mapang ka nung asenok alir. Iba mapang ya shitakba agibo mangyimtsüba mapang aser süoshi teshisa tejen agir lumia sarasadema amongtsüba mapang lir. Asenoki asen putu tensa mapang ya jungjunga bilemdangra, Nagaland raksaba ya ochimashirtemi masü saka ochimashi mapatem anema ola madokertemi raksar ta angatettsü. Iba ama nübortem ochimashi mapatem  anema ola madoktet tetsübu nung alidang, ano ACAUT dang masü saka senso tajungtem kari nüngsen, takoksa aser lendong tizükteta RTI ajanga state government kübok department aika nungi nübortem asoshi terenlok mapatem nung senotsü endokba metetnüa asüngdangbatem angudang kanga pelar. Aji oda, assembly nung ochimashi mapatem anema ola adoker meliaka aser nübortem rongnung timtem aser takoksa arema ochimashi mapatem anema nokdaker meliaka, RTI ajanga nübortem asoshi inyaktsüba mapatem bushisüngdangertem lira, item jagi nübortem kümzüktsü teimla tulu lir. Atangji, nisung aikati RTI ajanga government dang temetetnüba metettsü asoshi asüngdangaka tatem tashi bushia moi tom nung anenba osang aika lir. Item jagi nübortem akoksar. Ajisüaka, tangbo RTI ajanga nübortem yaritsü mulungtettertem rongnung S.T.Yapang aser Odi Jamir nungertem amai tasü tait aser Nagaland jungdaktsünüba shisatsü adenertemi inyaker asünungji ajaki mulunglemtetlemteta dang lir aser tenati department aika nung ochimashi mapatem kakshitsüba agi department aika aoksar lir. Tena ya kecha masü saka senso tajung kaka dang lir. Aji oda, tenati inyakba ama assembly nung amener kati danga inyak nungbo Nagaland agi kotak ama kümer lila ta bilemer. Iba kasaji Naga nunger lokti tentettemi ochimashi anema ola adoktet asübo, lokti tentet ajak züngsem saru aser tenla agi takar kümer lila. Ajisüaka, asenoki ochimeshitetba ajanga senotsü ajak ochimashirtem dang nungi imlar. Ibayongji, asenoki ochimashirtemang asenok loktiliba nung tongtibang kümdaktsür. Iba ama nübortemi ochimashi mapatem anema ola madoktet alidang, ano tajung kaji arogo nung sannükertem aikati kanga dang tasü itta ochimashi mapatem anema jembi tenzükogo. Aji oda, joko ochimashiba mapatem nungi aruba senbo tenla kidangia bener taru ta shitetba tamang aser tangatetbaji kanga junger. Idakji amendaker Nagaland tajungba küma yanglushitsü imlar.

You must be logged in to post a comment Login