Louis Tomlinson-i 1D fan ka nem sen $10,000 agütsü

Aenjeti 18, 2018 (Agencies): Louis Tomlinson-i One Direction fan tanur ka nem la anepalutsü asoshi sen $10,000 agütsü.
Arishi küm 9 tain, Rylee Sanford indang tsüraburtemi la nüngdakba osettem alia yutettsü asoshi parnok indang ki yanglushia aser la temang anepalutsü atema sen bendentsü mechi YouCaring page tenzükba ya arishi küm 26 tain kenteneri angazük.
Rylee ya Chatsworth, Georgia nungi lir, aser la dak ‘rare brain malformation bilateral close-lipped schizencephaly’ aliba ajanga la yaritsü asoshi balaka nüngdaker.
YouCare page nung lar tsüraburtemi, “Rylee-i ken aser shiruru meimer, akmesener saka onoki aji meimer…aser Zayn (Malik), Harry Styles, Niall Horan, Louis Tomlinson, Liam Payne, Jojo Siwa, Taylor Swift, Luke Bryan aser Sam Hunt meimer,” ta zülutsü aser la ya chichiba rarar aser la tejak nung teti menürem alir, ta shisem.
‘Smile for Rylee’ campaign angashia Louis-i Rylee indang page nung iba tenla ya Tentonü (15.01.18) nung agütsü aser “Nü dangi temeim ajak yoker!” ta zülutsü.
1D kentener telok nung külem züngsem, Zayn Malik-ia pa Twitter nung pa sülen anidaker million 26.4 aliba nung iba senotsü teyari bendenba otsü lemsatep aser iba ajanga pa saburtemi Rylee yaritsü asoshi senotsü teyari aika tenlatsü tenzük.