Lunar eclipse mapang Hyderabad nung tanur ka tenla agüja tepsetertem puogo

Hyderabad, Tsükali 16 (Agencies): Taküm Aenjeti (January) 31, 2018 aonung ‘super blue blood moon’ mapang nung Hyderabad yimti nung kinü tanur tetsür chanu ka tenla agüja tepseta liasü, aser tanur tepseter apu-ani na Hyderabad Police-i puogo.
Hyderabad Police-i ashiba agi, arasener ka tetuyuba nung ajemdaker taxi driver, Kerukonda Rajasekhar aser pa kinüngtsü, Srilatha nati kinü tanurji tepseta taküm tenla agütsü.
Rachakonda Police Commissioner, Mahesh M Bhagwat-i, ”Apuani naji mapang tatsüka shiranga dang arur, aser arasener ka tetuyuba nung tenati ibaji (tanur tepsetba) inyak,” ta metetdaktsü.
Tsüklai (February) 1 anepdang Hyderabad yimti kübok Chiluka Nagar kiyong nung aliba kilem kolak ka nung kinü tanur kolak ka tangzüker angu, aser iba dak sendakba nung police-i bushisüngdang tenzüka liasü.
Hyderabad Police tongti ketdangserisa, “Tanur kolakji tantsür kati anguba sülen police nem osang metetdakja liasü, iba sülen police-i melung melemi tantsülar jala kinüngbu, taxi driver Rajasekhar dang asüngdangyatsü atema apu. Iba sülen police-i asüngdangyaa bushisüngdangba mapang nung Rajasekhar jagi o aiben pelepshia jembi, ajisüaka DNA test agiba ajanga ochiji jungkai adok,” ta metetdaktsü.
Kinü tanurji tetsü den lenmang nung mejanga lia Rajasekhar o kinüngtsü nati puer aoba sülen Prathapsingaram anasa Musi ayong nung tekolakji tangzüka tenla agütsü.
Iba sülen pai temangji ayong nung indok aser tekolakji kidangi bener arua kinüngtsü tenapronglai külemküja mapa inyak.
Külem küja tembangba sülen pai tekolakji kilem kolaki bener tua ‘lunar eclipse’ itaya nung ayu.

You must be logged in to post a comment Login