Madras High Court-i Tamil Nadu nung Floor test magitsü tuyuogo

Chennai (Tamil Nadu), September 20 (Agencies): AIADMK MLA 18 anenja aliba dak sendakba nung Bodhbarnü Madras High Court-i, tetuyuba ka magütsü tashi Tamil Nadu assembly nung floor test magitsüla aser item menden atema by-elctions magitsüla, ta obendang agütsü.
Hombarnü Assembly Speaker, P. Dhanapal-i anentsüba MLA 18-i temepishiba ken o ka agüja liasü, aser DMK-ia floor test agitsü temepishiba agüja liasü, aser item ken o angadangba sülen Justice M. Duraiswamy-i, floor test aser by election magitsü oshidang agütsü.
T.T.V. Dinakaran pusemer MLA 18 Speaker-i anenja lir.
Taoba hopta DMK-i floor test agitsü atema temepishiba ka agütsüba dak sendakba nung court-i, Bodhbarnü tashi floor test magii atatsüla, ta metetdaktsü.
DMK-i court dang temepishiba ka ajanga, Angh, C. Vidyasagar Rao dang assembly ayongtsü aser Chief Minister K. Palaniswami dang majority sayutsü atema tetuyuba agütsüdaktsüner, ta mepishia liasü.
Court-isa Chief Minister, Speaker, Assembly Secretary aser AIADMK Chief Whip nunger dang, iba onük nung nenok tangatetba metetdakjang ta metetdaktsüogo.
Ano külen tanü nikongdang DMK party-i MLA tem senden ka ayonga liasü, ajisüaka court-i iba tetuyuba agütsüba sülen iba senden thinen.
Dalit party VCK lenir, Thol Thirumavalavan-i, Tamil Nadu nung tang yimtenren tensa ya Centre nung BJP-i aniba NDA sorkar ajanga lir ta nüburtemi metettsüla, ta aitsü.
Paisa, MLA 18 anentsübaji ozüng alema lir, ta ashi.
Ano Tamil Nadu Fisheries Minister, D. Jayakumar-ia, DMK aser Dinakaran-i state sorkar agientsü meranger, ta aitsü.