Mahabharata, Kalika-purana nung Arunachal zülusema lir

November 19, 2017 nü Itanagar nung President, Ram Nath Kovind (achiji nungi tasembuba)-i State Legislative Assembly tasen lapoktsüdang agiba noksa angur.  Noksa nungsa Arunachal Pradesh Governor, Brigadier (Retd.) (Dr.) B.D. Mishra, Chief Minister Pema Khandu aser Minister of State for Home Affairs, Kiren Rijiju nungertem angur.

Guwahati, November 19 (Agencies): Mahabharata aser Kalika-purana nung Arunachal Pradesh kümteta aliba zülua lir aser tamangba yimsü tsütsü nungi iba state ya kanga tongtipang lir, ta President Ram Nath Kovind-i tanü Itanagar nung ashi.
Itanagar nung aliba Vivekananda Kenra Vidyalaya küm 40 ajungba sentong nung President Kovind-i Arunachal Pradesh ji Bhishmak-nagar ta India putiotsü nung züluoka lir ta ashi.
“Mahabharata aser Kalika-purana nung Arunachal Pradesh ji Bhishmak-nagar ta zülua lir. Yangi Parashuram-i Lohit nung pa temenen shidok, Maharshi Vyas-i yangi külem aser Lord Krishna-i yangi Rukmini den kibong aküm” ta paisa metetdaktsü.
Himalayas tenem nungi Brahmaputra lenden tashi iba state ya tobur tajung aser iba ya India’er korang nung sentilung lir. Northeast tesem ya India indang korang süra, iba korang nung sentilungji Arunachal Pradesh lir, ta Kovind-isa shisem.
Tanü President Kovind-isa tanga sentong ka nung State Assembly building tasenba lapoktsü. Iba sentong nung o jembidang pai Hangpan Dada-i linük atema taküm bendanga agütsüba bilemteta jembi.
“Army jawan Hangpan Dada ji Tipar nung Borduriya anasa yimtsüng ka nungi liasü. Pai Kashmir nung kiralongrar den raradang pa taküm bendanga agütsü. Asür Hangpan Dada ji linük ajunga ajungemesor ka lir” ta Kovind-isa shisem.
President Kovind-isa Trans-Arunachal Highway yangluba aser Arunachal kübok district balala nung advanced landing grounds yangluba mapatem asoshi pelaba metetdaktsü.
“Shatabdi Express ka ajanga Itanagar sendaktepogo aser Trans-Arunachal Highway o advanced landing ground tem tembanga yangluba sülen tesentaktep kanga agi tajungba akümtsü” ta paisa metetdaktsü.
“Asen kidanger linüktem den arrtsüa aliba Arunachal Pradesh state-i sorkar Act East Policy nung ASEAN aser tanga South Asian linüktem den tesentaktep tajung yanglutsü ta amanger” ta President Kovind-isa ashi.