Maharashtra sorkari lajar atema sorkar mapa shilem ka lemzüktsür

New Delhi, Aenjeti 18 (Agencies): Maharashtra sorkari state nung lajartem atema sorkar mapa nung shilem ka aser shisaliok sector nunga shilem ka lemzüktsüogo.
“Iba telemtetba agiba ajanga lajartemi ajangshiba timtem kanga pungbatsü, kechiyong sorkar mapa bushidang parnoki parnok ‘caste’ mejangjar, aser ibaji ajanga timtem ajurur,” ta ketdangser kati osangbener ka dang metetdaktsü.
Osang angazükba agi, reservation ji general category nung asütsü, iba tetezü sorkari caste reservation quota shilem 52% alibajibo timba küma majungkettsütsü.
Parallel reservation tetezü, general category nung mapa tazüng alibatem lir, aser iba nungjagi shilem kabo lajartem nem lemzüktsütsü.
Bodhbarnü state cabinet senden ka amendang iba telemtetbaji agia liasü.
“General category nung reservation shilem ka agütsüba ajanga parnoki sorkar mapa angutsü aser tanga maongka balala angutsü,” ta ketdangsertemisa metetdaktsü.
Maharashtra nung lajar 3,900 tashi sorkari ketdangsüba orphanage balala nung lidar. Ajisüaka nija kidang aliba lajar densemabo aika asütsü.
Iba dak sendakba nung Women & Child Welfare Minister, Pankaja Munde-i, “Ibaji ajanga lajartem tajangzük angutsü aser parnok tarutsü atema lenmang tajung lapoktsü. Parnoki kodang orphanage oktsüdir parnoki timtem aika ajurur,” ta ashi.
Cabinet-isa Maharashtra State Innovation & Startup policy agizükogo, aser iba nungji sen crore 5000 indoktsü.
Chief minister’s office (CMO) osang ka ajanga ashiba agi, iba mapatong ajanga mapa tasen purapiteta inyaktsü atema sabang agütsütsü.