Malaysia nung school rongdoktsür lanur 7 apu

Kuala Lumpur, September 16 (Agencies): Kuala Lumpur nung Islamic boarding school nung mi senoktsüba atema Malaysia police-i nisung 7 apu. Iba lendong nung lanur 23 tashi rongset.
Tai tonglokja apurtemji arishi küm 11 nungi 18 tsüngdapurtem dang lir aser parnok anogo tenetnü tepuokdak ayutsü temelaba agütsüogo, Kuala Lumpur police ketdangser Amar Singh-i osangbener dang ashi.
“Par tenet apuba ajanga iba ken o tembanga bushitettsü ta ni nenok dang nangzüker” ta Singh-isa ashi.
Küm 20 tsüngda Malaysia nung lendong tamajungba atalokbaji iba ya liasü aser iba ajanga public kanga jashidaktsüogo. Parnoki tamangba dak sendakba school tem nung security akangshitsü takhangba agütsüogo.
Police-i apurtem rongnung temeket nung aliba kaketshirtem dena lir aser parnok karbo ganja achiba putetogo.
Kitsükkirong lendongji Brihostibar anepdang yakta atalok aser kaketshirtem mejanga lia parnok aika rongset.
“Parnok indang tebilemba jibo school rongdoktsütsüba liasü saka parnoki meshisatetba agi nisungtem dena rongsettsüsa lendongji atalok” ta Singh-ia metetdaktsü.

You must be logged in to post a comment Login