MANENI TEPELA NUNG TELUNGJEM – FILIPI 2:1-18

“Menemnemi aser menungnangi mapa ajak inyakang.” Filipi 2:16
Maneni asenok Khristan telungjem indang tanüa shisadangdi. Asenoki tebilemba balala aliba ajak tezülen yutsür Tebu tenüng tushitsü mapa dang inyakra, asenoki arogo nung aser arogo tezülen tesüngmangtsü mapa angutsü. Yangi telungjem asoshi mera ana agütsür.
Telok tila nung telungjem indang sayuang aser inyakang.
Tsüngrem yimli nung kechisarena mapa tila ka nungi tenzüker. Tsüngrem yimliji “jibi metsüjang” ka ama lir. Tang ibai “telok tila ka dang lir.” Yisui nütsüngtem dang “ana mesüra asem” sentepba indang sayu. Pai küm asem ser tesadang sayur külen parnok 120 nütsüng aküm. Parnok tebilemba ka dang liasü (T. M. 1:14-15). Kodang nütsüng 3000 aküm, iba sülen 5000 aküm, parnok obang ka nung dang liasü (2:41-44; 4:4, 32).
Telok tulu nung, telok tila jaklaji sayutsü akok. Telungjem nung ka dang küma alitsübaji kibongji lir. Tasen Lai mapang nung parnoki kidang telungjem nung sentep. Telok balala arogotem aser tamang telok balala (denominations) mapang-mapang kidang telungjem sarasadem akatsü akok. Yimer telungjem, tzükong telungjem, yimer sarasadem telok aser ibala mesükba tentet aika tenteta telungjem akar. Item tentettem nung ajaki külem ajungtsü bilema inyakra iba jagi telungjem adokdaktsütsü. Iba ama Khristan telungjem jagi asen meketa aliba Khristan purtem dang Khristan telungjem tajung sayutsü. Arogotemi meinyaktetba aika kibok telungjem ajanga inyaktettsü. Pentecost sülen nisung shia dangi akhümtsübu aru (T. M. 2:43, 46-47).
Tema tangutsü noksa masü tanela telungjem asoshi merangang Khristan telungjem tetezü Arogo ajak aser tamanger telok (denomination) ajak Arogo ka küboki anitentsüba masü. Ozüng yanglua mungdang ka tenzüktsü yangi mejembir. Arogoji lokti tentet ka mapang-mapang nung ajurutepba tebilemba lemsatepdak (club) ka masü. Khristantem aser telok tesendaktepji taküm asütsüla. Temenen nung süa alirtemji Yisui Mathi 22:32 nung “Tsüngrem taküm, Tsüngrem tasü masü” ta ashi. Isak aser Ishmael külemi alitsü makok. Tsüngremi Abraham dang Ishmael nem senmang kecha tagütsü ta ashi (Gal. 4:28-31). Nashi pungchi aser gado külemi alu inyakba nung amshitsü Tsüngremer ozüng agi memelar (Tazüng. 22:10).
Ka dang akümbaji mesüktepa masü ta angatettsüla. Telungjemji memesüktepi aliba mesüktepa (uniform) yangluba masü. Tsüngremer teyangluba nung tapu balala tebur junga yanglu. Yamaji telok nunga tebur-tetsür yanglubaji lir. Asenok rongnung tekülem tapu balala aika, yimsüsüba inyakyim balala aser sayutsüngiyim telemsa balala aika lir. Ibaji asen tashi lir. Tepela nung telungjem.
Oba Tsüngrem, Nai Ne chir shia nem sempet balala agütsüba asoshi Ne tenüng asanger. Itemji onoki telungjem nung amshitsü aser alima nung Na sentsüwangshidaktsütsü onok yariang. Amen.

You must be logged in to post a comment Login