Manipur CM-i Centre dang nungi ILP inyakyim meshi

Guwahati, July 11 (Agencies): Honibar nü Manipur Chief Minister, Okram Ibobi Singh-i lisopurtem kümzüka alitsü asoshi Centre dang nungi kidanger state kar nung aliba ama par state nunga Inner Line Permit (ILP) inyakyim alitsü asüngdangogo.

Tanü Guwahati nung Northeast Chief Minister tem den Union Home Minister Rajnath Singh senden amenba mapang Manipur CM-i, “Manipur lisopurtem kümzüka alitsü asoshi ozüng tapet ka latettsü asoshi takhangba taliba agütsüdagi. Iba kasa takhangbaji Meghalaya ama Northeast nung state kari khangdagi,” ta ashi.

Iba takhangba nung nüburtemi taliba pusemdagi, kechiyong Nagaland, Mizoram aser Arunachal Pradesh NE state tem nungbo ILP inyakyim lir,” ta ashi.

“ILP ama mesüra kasa onüktem nung NE state tem asoshi Centre-i ozüng kasa latettsütsüla. Iba onük asoshi Centre sorkari lenmang bushitsüla,” ta Singh-isa ashi.

Iba senden nung Chief Minister Singh-isa state nung police terenlok mapa balala asoshi sen crore 1,722.12 takhangba agütsüogo.

Paisa Bangladesh aser Pakistan arrtsülen aliba ama India-Myanmar arrtsülena atsü atsütsü asoshi takhangba agütsüogo.