Mao Council-i TPO dak tamang akar

Dimapur, July 11 (TYO) : July 11, 2015 nü Mao Council headquarter, Tadubi nung lokti senden ka agidang TPO-i Koziirii o Dziiko mangatettep ken o bentettsütsü atema mapa inyakba pusema nungiter ta bangjemtepogo, taa Publicity Wing, Mao Council-i sangdong ka nung metetdaktsü.

Mao Council-i iba onük ya sobaliba ozüng aser inyakyim ajanga lemtetdaktsünür. TPO-i iba onük atema khuret abentsü, ketdangsütsü aser telemtetba agütsütsü atema tashi lir aser ochi obendang agütsütsü.

TPO-i kanga dang nendaka aser süoki ia bilema iba onük asoshi inyakba nung Mao Council-i temulung alemer aser tamang akar. TPO-i Naga nunger adianu ana tiyongtsü nung tanga telok mesüra okadak maitdaktsüi iba mangatettep bentettsütsü imlar, ta Publicity Wing, Mao Council-isa metetdaktsüogo.