Mapa inyakba kolok

Tsüraburtemi teti pei chinurtem indang jembidang, parnok jagi lesson akoker asü makoker aser tashi angar asü manger ta jembiteper. Aji oda, alima nung tsürabur ajaki lesson akokba aser tashi angaba chirnur aginür. Ibayongji, tsüraburtemi tanurtem dang tashi angatsü aser lesson meranga bushitsü indang ajangajanga sayur. Aji oda, kodang tanurtemi lesson mekoklir aser tashi mangalir tsüraburtemi parnokji tekolok mali aser takidak makaba tanurtem amai bilemer. Ajisüaka, asenoki angatettsüba tongtibang kaji lesson makokba tanurji tekolok mali masü aser tashi mangba tanurji takidak makatsüba tanur masü. Tsüngremi nisung ajak nem tekolok aser shisatsü agüja lir, anungji shibai Tsüngremi agütsüba tekolokji tajungba amshidir, paji tangar dang nungi tekolok techiraba akümer. Iba tangatetba ya tang Malaysia nungi Mid Brain Activation indang tesayuba agütsür Mid Brain Masters nung tongti ketdangser Y.M.Wongi yakanü Dimapur nung kasa tesayuba sentong lapokja jembidang agüja liasü. Midbrain tetezü tekolok tiyongtsüba, anungji nisung kolak nung tekolok ya shilem ana küma lemsar lir ta angatetdaktsür. Aji oda asen kolok nung aliba tekolok ya tesadang ka tachijilen aser tesadang ka tabenlenlen lir. Iba kolok shilem aneprongla nungji nisungi Tsüngrem mesüka alima nung  tapu balala inyaktettsüsa tashi agüja lir. Tanü alima nung nisungtem asoshi nüngdak reprangteta tapu tapu purapiteta yanglurtemji pei kolak nung aliba tekolok tachiji aser tebelen na prongla chiradakja amshirtem lir. Iba Mid brain ajanga nisung ka tekolak nung achiji aser abelen aliba tekolok longjemdaktsür aser tekolok ajunga nemji mapa inyakdakja chiradaktsür. Iba ama nisung dak aketba tekolok amshiba jenjang asadangertemi ashiba agi, tanü alima nung alir, talisa Asia nungertemi parnok dak achiji aser abenlen aliba tekolok anaprongla mamshir, iba jagi tangar anülulen alir chirtem memeneper. Nisung ka kolak nung aliba tekolok achiji aser abelen aliba kolok ya tanur asüdangbo terarabo amshitsü tenzüker saka kodang tain kümdir tekolok chiratsüsa mapa meinyakdaktsüra anüalema akümer. Iba jagi yakta angatetba, yakta reprangtetba aser mulungzüng yutetba tashi samadoker. Aji oda, tanü Asia nungertem rongnunga tekolokbo shitak keta lir ser nung mechiradaktsüba agi tangar meneptsüsa meinyaktetter. Tang tashi nung alima nung nisungi ali, tzüim aser anüng nung senzüba aser yimzüba tesüngmangtsü gari aser tayimtsütem yanglutettertem ya America aser anülulen alir kintem tiemba lir. Tetezü anülulen alir chirnurtemi tekolok achiji asere abelenlen na prongla amshir. Iba jagi parnok kolok jagi anüng petinu aser tzüim telong ateta angur aser iba shisatsü jagi nisungtem anisüngzükdaktsütsü asoshi nüngdak tapu balala purapiteta yanglur.Tanübo, asenok chirtema America aser European nunger ama alima nung nüngdakbatem purapiteta yanglutettsüsa tekolok anatsülen amshia chiradaktsütsüla. Tanü putu nung nüngdakba tanurji tangari zülua yutsüba kisüng metetba masü saka peisasa pei dak aliba kolok amshia alima aser nübortem ajangzüktsüsa inyaktetba lenir ka asütsüla. Iba ama tanur ka kümdaktsütsü asoshi akok tashi tsüraburtemi tanurtem dak aliba sempet meteta parnokji sanga amshitsüla. Asenoki tanur tajung kümdaktsütsü asoshi anepludang metettsüba kaji, anogo piyong kecha lenia moudaktsüi lesson bushidaktsüba agi takok anguba tanur tajung ka makümtsü. Kidang lesson, lesson bushia kazüdaktsüba tanurji tekolok külen tilaka dang renloktsü, anungji tekolok tulu masütsü. Aji oda, achiji aser abelen aliba tekolok ajak renlokdakja amshitettsü asoshi tanurtem nem asayatsü mesüra parnoki mulungba mapatem inyaktsü asoshi mapang karbo agütsütsüla. Parnok dak aketba tajung indang jembitsüla aser teti takok angutsü indang jembia teimla agütsütsüla. Iba jagi parnok kolok arakzüa uludaktsütsü aser parnok kolok agi asen lima tajungba küma yanglutsü.