Mapa mangur tashitemetettertem !

Alima asünungji tangar lima nung ama Naga lima nunga tebilemtsü aika lir. Item tebilemtsütem rongnung Naga nungertemi Naga lima nung pei bok peri chiyongtsüa mezüsentetter aser tagitsü osettsüset yangludak industry kata lapoka maka. Iba ama tia ka nung Naga nunger tebok sünga aliba ya sorkar mapa nung ita sen achirtemi tsümar janga alia mesüba ajanga taküm litetter aser Naga nunger kar takar akümba ya sorkar sen amshidang ” adjustment’ junga agitetba ajanga akar. Tebok sünga liaka aser takar kümaka Naga nunger asoshibo tebilemtsü tulu lir kechiyong tangar lu nung züsentetba agidang asenok tebok asünger aser ‘adjustment’ ajanga akaba agidangbo asenok nem tarutsü teimla tajung ka magütsür. Ano, item ajak dakji alia tanü Nagaland nung ajuruba tebilemtsü tulutibaji tashitemetetterbo tashitemetetter saka mapa mangu kazüteper ta asüba lanur telok tuluka lir. Item dangji ” Educated Unemployed Youth” ta ajar. Tetezü zünger mapa mangurtem ta angatettsüa akok. Ajisüaka, kodang “educated” ta südir azüngba dang masü saka pa mesüra laji tashitemetetter mesüra mapa inyak meteta aliba nisung ta asenoki angatetdi. Aji oda, kodang tashitemetetter kati pei inyaktsüba mapa ka peisasa metenzüktetlir, alima nung timtemji idak nung jagi adoker. Tanü Naga lima nung Naga nunger peri danga chiyongtsü mesenzütetba aser Naga nunger nüngdak yangludak kata shingaia melapoktetbaji tashitemetetter dak, ashiko, shitakba tashitemetet maliba ajanga asütsüa akok. Atangji, asen lima nung mapa teinyaktsü mangu kangshirtemji tazünger aser tashitemetettertem dang masü saka ano parnok dang nungi teimba mazüng-memetetter lanurtem lir. Anungji, tazüng-temetettertemi mazüng memetettertem yaritsüla aser mapa inyaktsü len tajung sayua parnok tiaji tajungba küma yanglutsütsüla. Ajisüaka, tashitemetettertem asoshiang mapa bushitsü tebilemtsü tuluba süra mashi-memetetteretem asoshibo tsüngen o long na otsü amai dang asütsü, Tanü asen lima nung yimten aser lokti lenirtemi shisadanga bushitsübaji, asen lima nung kechiba tazüng-temetetertem mapa mangur ta asüba tasüngdangba ya asütsüla. Iba tasüngdangba nung telangzüba bushidang, asenoki iba tebilemtsü ya koktettsüsa teinyaktsü mapa aser aotsüba lenmang karbo ngutettsü imlar. Ashiko, zünga-shia meteter mapa inyaktsü mangutsüsa azüngba nisungji jungjunga azüngba nisung masütsüa akok mesüra asenoki parnok dang sayuba course aser lessontemji tanü putu nung tagidak makabatem asütsüa akok. Item ajakji yimten yimsüsür aser ketdangsertemi jungjunga ken meyipa reprangdanger, tazünger tashibo jungjunga azüngtsüsa aser züngzüker külen mapa angutsüsa tazünger ka dak tashitemetet alitsüsa tanü putu tensa dak apet temelenshi bener arutsüla. Atangji, alima nung tashitemetettertemi dang mapa adokdakja nübortem anisüngzükdaktsür, anungji tashitemetettertem mapa mangur ta asüba osangji tangar asoshibo tamamangtsü ka asütsü. Tanü nungi danga asenok kolok aser mulungjang nung tashitemetettertem mapa mangur ta asüba tebilemtsü ya akoktsü asoshi shisa tasen ka bushi tenzükdi. Joko, kodang nisung ka tashitemetetter kümdir, pa mesüra laji tangar asoshi teyarir tajung kaka asütsüla. Iba ama mapang ka kodang asen lima nung tenzükdir, idangji dang asen lima ya yimjiyimjung lima ka kümdaktsütettsü. Idangjibo shisatsü aser rongsen bushia asen limai tangar arutsü. Idangjiang asen lima aser asen aliba yimti renloktsü. Idangji dang asenoki kima yimdong tashi tzü agi shidoker yutsütsü. Tashitemetetter atema nükjidongji nübortem nüngdak ataloktsütsü asoshi inyaker asütsüla.