Mapa medeni tamang tasü; Saka mapa kisüng agi tamang memetendaktsür

~ L. Kika Pongener.

Mapa medeni tamang tasü: (Yakob-2:14-17). “Kü adianutem, nisung kati pa tamang lir ta shira, saka pa mapa melira, kechi tajangzük ? Iba tamang jagi pa kümzükteter ma ? Adianu mesüra adianutsür ka mangsa aser anogo shia chiyungtsü agi anünga lir, aser nenok rongnung kati parnok dang ya oda shira, “Junga oang, lemlema aser tepok sünga liang” Saka temang asoshi nüngdak kecha parnok nem magütsüra, aji kechi tajangzük ? Yamaji tamanga mapa melira, pa kija tasü lir”. Tenyar Yakob-i ashiba nungjagi asenoki tamangji mapa melira tasü-a ta jangja jangja angateter, kechiyong tamanger tajung ka ta metettsübaji, pai inyakba mapa, pa libaliro yimya, tangar den koda alir aser pa adenba lokti nung pai koda inyaker, iba jagi dang pa tamangji metendaktsür. Asenoki tali rajema angatettsü atema tatishitsü otsü kar ajanga angatettsü merangdi. Arogo nung tenzüker tajung ka, libaliro ajak nung asüngteta aliba taküm ka, teti sentepi aor, tershilem tenla shidak agütsür, oda tereprangtsü nungbo Temeshi nisung ta ashitsü akok. Saka pa adenba lokti ajak nung shinga dena meputeter, pa tenzükba aser inyakba mapa ajak nung tashishitsü keta dang inyakteter, pai ketdangsüa inyakba mapa kecha nunga ochi mali. Ano office nungbo babu-saheb asünungji, public kar pa teyari nüngdaka arura, süngo ajemtsü senotsü teraka magütsü tashi, pai tenarong marepzür aser pen marakzür. Iba tenzüker-sang mapa jagi pa tamang memetendaktsür. Ano Counsellor adianutsür tajung ka, Revival ajunga nung la Tanela sempet ajanga arogopurtem aika temoatsü angur, saka temeim aser taremzük shisatsü agi anünga aliba taküm ka, kima yimdong nung jajadang, bazar-len senzüdangbo, limapur taküm ka-ang mesüka, tsüma-longmar aser mashi-malu nisung ajak den, tila-tiri ajak nung asatepa raratepa senzür. Lar kibong telungji angoka reprangdangra, kinungbu aser lar chirnurtemji tetsübutsü aser ajaki sempatsüsa libaliro kangasa majung, oda lai la kinungbu aser chirnur kechi tia nung lir kecha memeteti senzür. Aji oda, item ama mapatem ajunga jagi la tamangji memetendaktsür. Tsungrem o-i ashir, “Nenok rongnung teshiteter aser tangateter shiba lir ? Pai pa taküm tajung agi shisatsü ajemaluba nung pa mapa sayudakjang” (Yakob-3:13-14).”Aser Kibuba tenzükeri merarateptsüla, saka ajak tsütsü ajemalu, tesayutsü tesangra aser tazüzükba taküm asütsüla”(2Timoti-2:24). Ano Missionary ka, Evangelist ka, aser arogo nung toklang tenzüker/tenzükla ka, pa/la aliba yimtsüng aser arogo nungji arogopurtem rongnung telok telok lemsa, aser Missionary, Evangelist aser toklang tenzüker/tenzüklaji-a telok ka nung kanga tekong meranga shilem agia aden. Aji oda, kodang lokti ka nung, telok telok lemsadir, lokti yimya asünungji, kar temeden asütsü aser kar tai asütsü akok. Ajisüaka, Missionary, Evangelist aser toklang tenzüker taküm kaji, akok tashi ajak tsütsu saku-ku, ajak den yimjung sür, shinga tai temeden ta tepo küma mejembi-i tiyongtsü nung alitsüla, aser tetsüngdai yia yimjung yanglur ka asüba-ang tajungba. Aji oda, Missionary, Evangelist aser toklang tenzüker ka tip külen zükloker, tekong meranga tongti shilem agira, pa/la-ji kar asoshibo temettsüdaktsü long ka dang asütsü, kechiyong Missionary, Evangelist aser toklang tenzüker kaji, alima nung Yisu Khrista melena tesayur, lennir aser tenzükertem lir. Atangji, parnokji kar kisüng atema dang “Sannüker” masü, saka ajak atema sannüker lir. Anungji akok tashi Missionary, Evangelist aser toklang tenzükertembo, ajak den yimjung ser, ajak tsütsü tejak shitsür, külena-külena balaka shilem agia medeni aliba-ang tajungba. Iba tenzüker/tenzükla ya-a pa mapa jagi pa tamang memetendaktsür. Tsungrem o-i yamai ashir, “Nenok nisung shiai yamai ashir, Ni Paul nübu, Ni Apolo nübu, Ni Kefa nübu aser Ni Khrista nübu. Yisu Khrista lemsa asü? Paul nenok atema kangki nung angenlok asü ? (1 Korint-1:12). “Shiri yimjung yanglur, parnok temoatsüba; kechiaser parnok dang Tsüngrem chirtem ta ajatsü” (Mathi-5:9). ” Kokrabang naibo nisung ajak den yimjung nung liang ” (Rom-12:18). Yakob-i pa shiti nung züluba tongtipang, pai shinüba oji ibaji lir, asenok Khristan tamanger tajung ka ta kulisübaji, o agi jembiba agi masü, saka aseni inyaksangshiba, asen libaliro aser jaklaliro yimya, aser taküm asüngteta meshiteta aliba, aser asen taküm mapa agi inyakteta sayuba, itemji ajanga dang asen tamangji metendaktsür. “Mapa medeni tamangji tasü lir”.
Mapa kisüng agi tamangji memetendaktsür: (Rom-3:27-28). “Mapa inyakba ajanga asü ? masü, saka tamang ajanga”. “Anungji ozüng mapatem medeni nisung kaji tamang ajanga dang metendaktsür ta asenoki metet “. Rom-5:1. “Anungji tamang ajanga asenok metendaktsü nung, asen Kibuba Yisu Khrista ajanga asenok Tsüngrem den tesunep nung lir”. Tenyar Paul-ibo mapa agi masü, saka tamang agi dang metendaktsür, ta ashiba o ya kodang angatettsü merangdir, Tenyar Yakob-i “Mapa medeni tamang tasü, mapa agi dang tamangji metendaktsür”, ta ashibaji tena kati ka aitsüteper amai angateter. O-len anaji khenyongi balala amai angateter. Ajisüaka, tenapronglai ashiba o-ji sendaktepa lir ta asenoki kodang arok-aroka shisadangdir tejangja angateter. Mapa agi tamangji metendaktsür, saka ano mapa kisüng jagibo tamangji memetendaktsür. Asenoki iba o ya tali rajema angatettsü atema, otsü kar tatishitsü amshia angatettsü merangdi. Adianu tajung ka, temesepba chiyongtsü achi-ajemba ajak nung asüngteta alir, libaliro ajunga nung tashishitsü maka, ajak dang temeim mapa inyaker, angadi jenti agütsür, ajak den yimjung nung alir, shinga dena merarar, shinga anema o tamajung mejembir, pa adenba lokti ajak nung mapa tajung inyaker, ochishia alir, pa mapa kecha nunga tashishitsü maka. Ajisüaka, iba adianu tajungsang yagi Yisuji kü kümtetdakba aser kü kibur aser kü kümzüksang ta, pa tebang agi menangzüker aser temulungjang agi magizükteter. Pa yanglusang Kibur “Tsüngrem” ka lir ta tamang katetba pa dak mali. Anungji pai inyakba mapa tajungtem paika jagi pa tamangji memetendaktsür. India nunger nüjiso ngudaktsüsang Mahatma Gandhi shiba dang “Father of the Nation” ta aja, pai Temeshi laishiba ya teti azüng ta otsü angashi, aser laishiba nung shia aliba ajunga shidak benshia inyak. Ajisüaka pai Yisu Khristaji kü kümtetdakba aser Kibur ta magizüktet, kechiyong pa “Hindu Ordodox” nisung ka, Hindu yimsü nung akhangakhanga amangba nisung ka liasü. Mahatma Gandhi-i mapa tajung aika inyak-aka, pai Yisu Khristaji pa Kibur aser kümtetdakba aser pa kümzüksang ta agizükteta mamang nungji, pa kodaki aotsüsa tanela tekümtet mengutet. Tsüngrem o-i ashir, “Kechiaser nai ne tebang agi Yisuji Khrista ta nangzükra, aser temulung nung Tsüngremi pa tasü nungi shia arudaktsü ta amangra, na kümzüktsü, kechiyong temeshiba akümtsü asoshi nisungi temulungjang telung nungi amanger, saka tekümtet angutsü asoshi tebang agi nangzüker” (Rom-10:9-10). Tenyar Paul-i shinübaji, mapa tajung inyakba agi masü, saka Yisu Khrista agizüker, pa dak chichia amangba ajanga dang metendaktsütsü ta ashibaji ibaji lir, aser aji kangasa shidak lir. Mapa tajung inyakba kisung agi tamangji metendaktsür-a ta asünungbo, Mahatma Gandhiji ya-a tekümtet ngur lila. Ano Tenyar Yakob-i ashibaji, tamanger ka tamanger tajung sernung mapa agi inyaka mesayutetra, pa tamangji kecha tetezü maka, tasü den saku ta ashibaji ajia kangasa shidak lir. Paul-i ashibaji ozung mapa benshibaji temenen masu, kechiyong ozung ajanga dang temenenji kechi’ar metetdaktsur aser tuteta sayur. “Ajangla asenoki kechi ashitsu ? Ozungji temenen asu ? Yamaji kodanga masu ! Aji suaka, temenenji kechi ni memeteti liasu, ozung ajanga dang ni metet (Rom-7:7). Nai tenukshi ta ozungi mashi asubo, ni tenukshiba memetetla”. Mosa ozung nung, “Nai tetepset, nai tauya, nai nuktapangda tepenshi, tiyazu kuli teyi … item ozungtem ya ashiba ajanga item ya temenen-a ta asenoki meteta akum. Anungji asenok tamang metendaktsutsu asoshi item ozung mapatem ya shidak benshitsula, item ozung mapatem ya shidak mebenshira asenok tamangji tasu-a ta tenyar Yakob-i ashir. Ajisuaka, temulongjang taroktiba nungi tamang kaatetba mali sernung, tema tazutsu yimsu ozung mapa ka amai inyaka benshia sayuba agi dangbo memetentsu ta Paul-i ashir. Yihuda nunger Farise aser Saduki-temi ozung mapatemji yamaji benshia sayu, saka telunglenbo tesempatsu leper ama teshinem menema liasu. Anungji Yisu-i parnok dang nukpoker lenirtem ta aja. Ozung mapa benshiba agi metendaktsur ta asunungbo Farise aser Saduki-tem ya metenla. Atangji, tenyar Yakob-i ashiba aser tenyar Paul-i ashiba o ana ya kati ka aitsurba masu, saka anapronglaji sendaktepa lir. Anungji asenoki asenok khristan tamanger tajung ka ta mapa agi inyakteta kulisua sayudi, aser asenok tebang agi Yisuji ku kumtetdakba aser Kibur ta nangzuker temulung nung amanga, tema tazutsu ozung mapa benshir tamanger ka masu, saka chichia Yisu Khrista dak amanger khristan takum ka-ka asutsu merangdi ta, iba o agi tazunger ajak ajongshir.