MAPANG KOBIKA MESÜRA KODA TAJUNG?

“Temenenpur kati mapa tamajung noklangben inyaka pa arishi langaka, saka ni kanga junga metet oda Tsüngrem tsübuba pur shiri Pa dang tsübur, parnok jungküm.” (Sayu. 8:12).
Arishia linübaji nisung ajak yimya. Küm kwika lidir liang anogo shia tashi anga Pa den jajaba jagi dang taküm jenjangji agütsür. Tsüngrem dang arishi talang ka agüjang ta sarasadem dang nungi asenoki yamai sarasademdi, “Alima nung Nai mulungba tashi alidang Ne den tashi anga jajatsü yariang.” Ibaji Zakaria sarasadem liasü: : “Asenok arishi anogo tepiyong metsübui Pa temeshiba nung tenzüktsü asenoki tsükchir ket nungi kümzük” (Lk. 1:74,75). Temeshi tain nisungi alima nung alidang teti tatem maka taküm asoshi renemtsü angatetter.
Tenyaba mapa tuluji shirangba, aniatokba aser tepsetba ajanga mapang tatsü ka dang inyaktsü akok. Hindu militaryim, Muslimi par yimsü nung sotba aser kin (tribal) yimsü asentenshiba ajanga, sayutsüngiba mapa tepsetba nungi kümzüktsü mekoki aküm. Saka Khristai Pa ozüng nung tashi angaa jajaba manentsü atema Pai mapang chilia asenok dang ashi: “Ammang nung ni nenok dang kechi ashir, aji nenoki sangwa nung jembiang; aser nenok narong nung kechi tanemi ashir, aji kilem manungi ayimang. Aser shiri temang tepseter, saka tanela tepsettsü makok, parnok tetsübu. Saka shibai tanela aser temang anaprongla molumi nung samatsütsü akok, Pa ang tsübuang.” (Mathi 10:27, 28).
Yohan Baptitsübai Herod chuba taküm otsü pa dang ammang nung ashiba pai tesangwa nung jembi. Iba jagi pa tekolak atang. Pa küm 35 a mali! Nütsüng 12 rong nung Yohan dak alema ajak tepset. Tenyaba ozüng tashi anga parnoki alima ajak dangi ao. Parnok nisung dang masü Tsüngrem dang tashi angatsü lemtet nung parnok rishikangshi (Ibri 11:35).
David Brainard (1718-1747) Tsüngremi ajaba tashi angaa North American Indians den mapa inyaktsü ao. Pa küm 28 tain kor nung sanger 3000 miles tashi osangtajung sayutsüngia ao. Pa küm 30 majungdang süatok. Lanur aika shirnoki pa taküm otsü azüng alima ajaki missionary mapa inyak. Item rongnung William Carey a ka liasü.
Oba, metsübui Na tenyaba nung tashi anga metsübui alima balalai missionary aotsü tasü tait bendanga agütsüba lanur aika ozü lima nung adokdakjang. Amen.