Mayweather nungi Welterweight takokba meyipa agiadoker: WBO

Las Vegas, July 07 (Agencies): America nunger nungtugu tsüngteper, Floyd Mayweather-i Philippines nunger Manny Pacquiao madak takok ngua agizükba world welterweight takokba meyipa agiba osang ka World Boxing Organization (WBO)-i tanü Mongolbar nü metetdaktsüogo.
WBO-i latetba ama Mayweather-i meinyakba yong pa nungi takokbaji meyipa agitsüsa aküm ta par teloki metetdaktsü.
Mayweather-i taküm May ita nung Pacquiao madak takok anguba sülen points 48-0 ngua temaba jenjang ngutet saka Pacquiao den toktepa tsüngteptsü asoshi latetsüba taa sen, US nunger dollar sen 200,000 mapang shitak nung magütsüba aser pai taoba mapang akokba junior middleweight takokba memeyiptsüba yong pa merenshitsüsa aküm ta WBO-i ashi.
Par telokisa ashiba agi, tsüngteper kati temang touzük seret kasa shilem indang takokba aika ayutsüji ozüngi memelar anungji, Mayweather-i koba shilem indang takokba ayutsü jangrar iba osangji mapang shitak nung metetdaktsü nungdaka liasü saka pai yamaji meinyak.
Mayweather-i koba shilem indang takokba ayutsü lemtet iba osangji WBO dang taoba Hokolbar nikongtsütsü 4:30 ako tashi nung metetdaktsütsü asoshi mapang agüja liasü.
“Mayweather-i teinyaktsü maparen mapang shitak nung meinyakba yong WBO World Championship Committee-i pa WBO World Welterweight Champion ta mezüngoktsüsa akümer,” ta WBO-i metetdaktsü.
Pacquiao madak takok ngua tsüngtepba sülen sen million 200 dak tema aazüksang, Mayweather-i pa nem agütsüba o bendangji tanaben reprangshitsü onük benoktsü asoshi hopta ana tashi mapang agütsüogo.