Mazüoktetba teburtem

Shi azü shitakba adenba tebur ka asoshi tetsür den kazünübaji kecha tesüngmangtsü mali. Iba kasaji shi azü shitak adenba tetsür ka asoshi tebur den kazünübajia tesüngmangtsü ka masü. Item ajakji alima nung tetsür aser tebur yangludang Tsüngremi nisung temang nung enoktsüba tashi, tejangraba aser temoatsü lir. Anungji, tetsür-tebur ajaki iba tashi, tejangraba aser temoatsüji Tsüngremi agütsü ta angateta peisasa pei taküm aser temang azüoka alitsübaji kanga tongtibang lir. Ajisüaka, aiben teburtemi pei shi azü mazüokteti tetsürtem mezüngmeshir aser karibo tashiyim agi raksatsür. Iba ama otsüji akhidang India sepaitemi reshikangshi dang nungi tenzüka tanü tashi nung Naga lima nung Nagatsürtemi ajuruba aika alitsü. Tanü item otsütemji miima meyui temulung yirua aliba zübo aneptsü aser yaser tarutsü nung teburtemi tetsürtem mashi mezüngmeshi masütsü asoshi tetsürtemi nungnanga, tsübua aser akmesena melii ola adoktsüla. Atangji, tanü asüngbo teburtem dang nungibo tetsürtemang temetetba, tasü taitba aser shisa tesademba lir, ibayongji teburtemi tetsürtem mezüngmeshi masür. Akhidangbo, tetsürtemi teburtemi aibelenba anema ola adoktsübaji taaktsü mapa inyaker amato liasü. Iba jagi tebur nem tashiyim agi merenshia mezüngmeshidaktsüli aji miimbanga yuli ta shingaia memeteti tetsürtem aika temulung zürep tia nung alitsü. Ajisüaka, tanübo tetsür aikati teburtemi pei shi azü mazüokteti parnok anema inyakba anema jakdaka ola adokba angur. Item rongnung taoba hopta nung Dimapur nungi Kohimai atuba taxi anishir kati pa gari nung külemi mener atur tetsür ka dak gari tetudak nung mekongshitsüla nung kongshia anir atuba anema ola adokbaji, iba tebursang kija anema ola adokba mapa ka masü saka mazüoktetba teburtem ajak anema ola adokba ola ka lir ta angatetdi. Atangji, tetsür kati tebur ka anema ola adoktsübaji tasak, ajisüaka temulung nung kecha matidagi mapa tamajung inyaker anema ola adoktetba tetsürji tangatet aser iba ama ola jagi tetsür kija masü saka teburtem aika lendongi aitsüba nungi kümzüktsü. Teburtemi peisasa pei shi azü mazüoktet tetsür anema tashiyim agi mapa tamajung inyakbaji mapa tamajungtem rongnung tamajungtiba lir. Tetsürtemji teburtem asoshi ojala, oyala, tenüla mesüra pei kinüngtsü asütsü. Item ajakji tebur ka asoshi kanga tongtibang takümtem lir. Tetsür medeni tebur takümji kecha sütsüa masü azüngazünger aser alima tatembang asütsü. Ibayongji, shiba südir süang teburtemi tetsürtemji pei asoshi teyarir tajung ka ta angateta kanga meima aser kanga akümtsübua amshitsüla. Alima nung ajak dang tobur tajungtibaji tetsür o tebur na kati ka akümtsübua aser meima medemba aser alibaji lir. Iba jagi tetsür o tebur na prongla jangratema pelashishia aliba dang masü saka alima tobur jungdaktsür. Temeim aser akümtsübu nung tashiyim amshitsü tesem tilakata mali, anungji maksü ajurutsüa mali. Atangji, tanü asüng lima nung shi azü jangraba inyaktsü asoshi melamelar. Ajisüaka, item tatidangtemji koktettsü asoshi tebur ka taküm tanüla, temang aser tekolok shisatsü renema alitsübaji kanga tongtibang lir. Alima nung ali tashi shi azü jangraba inyaktsüsa aruba aser ajuruba tatidangtem taru ta meshitettsü. Item tatidangtemji melira alima masütsü. Anungji, tatidang tarudaktsü ta masü saka tatidang arudang akoktsüsa tashi aser tangatetba kua ta sarasademtsübajiang tongtibang lir. Atangji, alima nung ali tashibo tatidangbo tarutsübasa, anungji ano tatidang nungi ajentsübajia kanga tongtibang lir. Anogo shia Tsüngrem dang sarasademba aser anogo nung kenbo asentsü sendoka mapa inyakba aser pei akok mapa inyaka teti mazüngi aliba takümji tatidang nungi ajentsü merangba takümtem asütsü. Pei taküm nung pei kibur, anungji kibur nungi temelaba magi temeyongi mekongshitsüla nung mekongshitsü, tebangi mejembitsüla mejembitsü aser tetsüngi maotsülaleni maotsü. Item ajakji kiburi temelaba agütsür inyaker. Iba amaji peisasa pei taküm azüokteta lira, tebur ka asoshi temoatsü kechisarina ajak yangji lir.