MDTOA-i Mkg PWD EE aitsür; Nov 21 nungi chakka bandh tenzüktsü

Dimapur, November 17 (TYO): Executive Engineer, PWD National Highway Division – II Mokokchung-i Mokokchung Deputy Commissioner dang National Highway 702D (Marani-Mokokchung road) indang osang tiyazü ashiba aitsür, ta Mokokchung District Truck Owners’ Association (MDTOA)-i metetdaktsü.
MDTOA ketdangpurtem den Mokokchung Town Lanur Telongjem (MTLT) aser Mokokchung District Pick-up Truck Union züngsemtemi lenmang tonga oa reprangdangdang EE PWD-i iba lenmang nung garitem junga dang senzüdar ta Mokokchung DC dang ashiba osangji tiyazü ta putet, kechiyong iba lenmang ya kangasa majung lir, ta MDTOA sangdong ka nung metetdaktsü.
Executive Engineer-i züluba shidiji magizüker aser pai nübortem mashileni anitsü memerangtsü atema kümdangtsü tuyur, ta MDTOA tir Sangyumongba Ao aser tongti tezülur Imtisumak nati sangdong nung shia lir.
Maneni, Mokokchung DC-i November 17, 2017 nü MDTOA dang bangdak department-i Mokokchung-Mariani yanglutsü atema mapa inyakdar, anungji anogo 10 nü apulokjang ta züluba shidi magizüker, ta tenatisa ashi.
MDTOA-i lenmang reprangdangogo aser tang lenmang yanglutsü atema mapa inyakba kecha mangu, ta mendenpurtemi ashi.
Iba kasa onük atema October 30, 2017 nü MDTOA-i Memorandum ka agütsü saka District Administration nungi telangzüba kecha maliasü. Iba sülen MDTOA-i November 14, 2017 nü November 20 tashi anogo züngzüktsü saka bangdakpurtemi iba takhangba zübazüba agiba aser ano talisa Executive Engineer PWD, Mokokchung-i tiyazü jembiba atema November 21, 2017 nungi MDTOA-i chakka bandh alitsü, ta mendenpurtemisa shisem.
Iba anogo nungi Mokokchung-Mariani aser Mokokchung-Amguri lenmangtem nung ‘commercial vehicles’ ka danga mesenzütsü. Lenmang majungba ajanga truck gari kiburtemi takoksa jenti angur aser garitem nunga khu tabentsü mebenteter. Iba denji külemi khu bener senzüba shia gari yanglutsüsa akümer. MDTOA-i mapang talangka aremzükogo anungji onoki ayongba chakka bandh alitsü.
Mokokchung Town Lanur Telongjem aser Mokokchung District Pick-up Trucks Union teloktemi MDTOA pusema nungitba atema kanga pelar, ta mendenpurtemisa ashi.