MEA-i Modi indang Passport thinentsü

New Delhi, Tsüklai 16 (Agencies): Enforcement Directorate (ED)-i benokba nung ajemdaker Ministry of External Affairs (MEA)-i Nirav Modi aser Mehul Choksi na indang passport hopta pezü atema thinentsüogo.
Tanü Ministry of External Affairs-i, tang-tangbo parnoki jewellery designer, Nirav Modi ji kong ali’ar memetet, ta metetdaktsü.
Modi aser Mehul Choksi na indang passport thinentsüba sülen MEA otongdar, Raveesh Kumar-i, “Tenati tanga linük kechaia moutettsü. Iba nisungba yagi onok ketdangser ka dena tongtepratep masür aser tang-tangbo onoki pa kong ali’ar memetet,” ta metetdaktsü.
Modi aser Mehul Choksi nati kechiba parnok passport ji methinentsütsüla, ta asüngdangtsü atema MEA-i tena nem hopta ka mapang agutsüogo, iba mapang nungji tenati tasüngdangba kecha makara passport ji khenyongi agientsü, ta MEA-i sangdong ka ajanga metetdaktsü.
Modi aser Choksi naprong taoba ita India toktsür jenogo.
Sen crore 280 agi bank ashioktsüba ken o dak sendakba nung Punjab National Bank-i ken o ka agütsüba nung ajemdaker Central Bureau of Investigation (CBI)-i ken o ka benoka liasü, aser yashi ED ketdangsertemi Mumbai, Delhi aser Gujarat nung Nirav Modi indang kiojen aika mita ao, aser iba mapang nung diamond densema senti osettem sen crore 5,100 jenjang puogo.

You must be logged in to post a comment Login