Mechanised Pottery Unit ka lapoktsüba atem sen crore 10 agütsüba ochi meshi amshi

Imphal, September 14 (Agencies): Brehostibarnü Manipur Assembly Speaker Yumnam Khemchand-i ashiba agi, mechanised pottery unit ka lapoktsü atema sen crore 10 agütsüba samaaogo.
Iba olen ya pai Ukhrul district kübok Nungbi tesem nung potepba tesem kar semdangba mapang nung ashi.
“Iba fund ya North Eastern Council ajanga agütsüadokogo, koba Nungbi tesem nung aliba potepertem ajangzükdaktsütsü asoshi mechanised unit ka lapoktsüba atema agütsü. Saka iba fund ya mopung nung samaaogo. Iba sen ya küm ana tejakdang sanction süa liasü,” ta Khemchand-i ashi.
Paisa ashiba agi, sen ochi meshi-i amshiba ya Centre sorkari meteta lir aser iba dak sendakba nung yakta bushitsüngdangtsü.
Ukhrul district nung ali agi yangluba oset balala ya kanga dang ajak len aginüa bushir.
“Mechanised unit ya lapok asübo iba tesem nung pottepba ya alima ajunga nung ano tali dang nungtugu kümer lila,” ta speaker-isa shisem.
Manipur Chief Minister N. Biren Singh-i ochimashiba maparen ajak raktoktsü asoshi nangzüka arudar aser tawa iba ochimashi ken o ya putetogo.
“Sorkari iba ken o dak sendakba nung bushitüngdangtsü aser aibelena alirtem atsütettsü. Iba ya tribal potepertem mezüngmeshiba maparen ka lir,’ ta singh-i ashi.
Sorkari ano maneni Centre nungi aruba fund tem ochimeshi amshia aliba putettsü asoshi temolung agüja asadangdar.