Megalaya nung GNLA tanishir ka kahsetogo

Shillong, July 9 (Agencies): Nübur aika tepsetba aser state nung bomb lendong agütsüba ken o nung aputsü bushia aliba Garo telungpur tanishir ka Brihostibar nü Meghalaya Commando temi kahsetogo.
Special Weapons and Tactics (SWAT) commando temi Garo National Liberation Army (GNLA) tanishisang, Savio Marak, Daroka kahsetogo, ta police ajanga metetdaktsü.
Intelligence-i tetuyuba agütsüba nung ajemdaker commando temi Shillong nungi kilometre 300 shi pilar aliba district headquarter, Williamnanagar anü olentip nungi kilometre tenet shi pilar aliba Rengregre yimtak mita oa liasü.
Iba mapang telungpuri commando tem dak injang akahtsü tenzükba ajanga commando temia meyipa akah, ta IGP (Operations) G.H.P. Raju-i IANS osang ajanga metetdaktsü.
Savio ya taoba mapang Meghalaya police nung constable liasü.
Commando o telungpur na minute 30 shi kahtepba sülen Savio kahsetba ya police tem asoshi takok tulu lir, ta Raju-i ashi.