Meghalaya, Nagaland, Tripura nung BJP-i sorkar akümtsü: Rudy

Shillong, Tsüklai 12 (Agencies): Meghalaya, Nagaland aser Tripura nung taruba sorkar ya Bharatiya Janata Party-i akümtsü, ta iba party nung lenir, Rajiv Pratap Rudy-i Tentonü temulung lema ashi. Tripura nung election ya Tsüklai 18 nung agitsü, iba sülen Nagaland aser Meghalaya nung Tsüklai 27 nung agitsü. Vote ya Metsüremi 3 nung azüngtsü sentong lir.
“2009 nung state toku nung BJP sorkar kümteta aliba nungi tangbo coalition den külemi state 19 nung sorkar tenteta lir. Maneni onoki asem tali inoksemtsü, mezüng Meghalaya, Tripura, aser Nagaland aser pezübuba nung Karnataka,” ta Rudy-i Shillong nung osangbener dang ashi.
Taoba Union Minister ya Shillong nung lir aser pa ya East Shillong, South Shillong, North Shillong aser Pynthorumkhrah assembly constituency nung party candidate atema nübu yima jajaba mapang ka lir. “Meghalaya nung temelenshi aliba ni ajiteter aser linük ajunga nung asenok tenük agi anguba ama nüburtem temelenshi asoshi temulung melener. Congress dak nükla mali, linük ajunga nung parnok tsüngnep samaogo aser state ishika teraksar lir aser item rongnung Meghalaya ya ka lir,” ta pai ashi.
“Onok manifest nung employment, industrialisation, youth empowerment, tourism aser employment den külemi onoki rural development inoktsü, koba asenok atema tongtibangtiba teinyaktsü lir,” ta Ruddy-i shisem.
Meghalaya nung temeyoktep sorkar akümtsü asü, ta asüngdang dang, “Onoki temeyoktep/teloktep sorkar indang mebilemer, kechiaser onoki majority angutsü. Ni temulung lemtetba nung taoksa. Ni taoba küm 30 tashi election nung shilem agia arur aser Meghalaya nung BJP sorkar akümtsü temulung lemteta lir,” ta BJP lenir-isa ashi.
Act East Policy indang jembiba mapang Rudy-i, lokti balala melenshiba aser tashi temetet lanur aliba ngua Meghalaya nung tali temulung agütsü, saka tejashitsüka onoki Delhi nungi angazükba agi, state nung aliba sorkari mapa shidak meinyaker aser terenlok ya Union sorkari dang bener arutsür, ta ashi.
Congress-i aniba Meghalaya United Alliance sorkar indang aija jembiba mapang, “State-i maparen aika meinyaktet aser tanga state tem bullet train aser metro tem indang jembiba mapang, tia makatsüka Meghalaya nung rural development indang ang jembir,” ta pai-sa shisem.