Meimchir Tashi Kijaibo Makoktsü

Asen lima aser lokti nung temenen balala tongbangji meimchir tashi kija agibo makoktsü saka Tsüngrem tashi nüngdaker; aser iba nungji Arogo teinyaktsü shilem lir ama bilemer.  Alima nung ochimashi malitsü atema pei lima aser sorkar sasep nung temzüng ozüng peria lateta lir, ajisüaka junga mebenshiteter, kechiyong temzüng-ozüng yanglurtemi anir nüburtemi ozüngji raksar. Laishiba otsü nung, nüktapangtatsür kati nüktapangta benshia aliba ngua Farisi aser tezülurtemi (Arogo) la Yisu dangi anir oa Mosa ozüng nung ajemdaker la lung agi onsettsü atema ashi, ajisüaka Yisui ‘nenok rongnung shiba dak temenen mali, pai tama la dak lung agi onang’ ta ashi. Saka parnok ajaki temenen menaa aliba agi ola madokteti toktsür ao. “Arogoi alima nung lokti temenen balala mesüra ochimashi anema ola madoktetra Farisi nungeri ola madoktetba amaji Arogo dakjia langka tai alitsü südi” ta angajemtsü akok. Arogo-i longkak aita tashiyim amshia ochimashi anema inyaktsü ashir masü, saka yimjak nung tanak dang tanak, temesüng dang temesüng tabo shitettsüla. Yi nokdangba Act atema Nagaland nung Arogotemi lumia sarasademogo, süra tang ochimashi tashidak atema-a lumia sarasadem nung koda? Nagaland nung NBCC-i rongshiba marem sorkari Liquor prohibition Act benoka agizük, aser ibaji takok tulu ka ama züngshir, ajisüaka atangji nungbo Arogo atema iba ya tamakok tulutiba rongnung ka asütsü südi, kechiyong iba mapang nungtu khen lumia sarasademba sülenbo Arogoi züktsüka yutsüogo. 1990 küm Nagaland nung yi meyanglutsü aser mayoktsü asoshi ozüng yanglur joko taküm agi küm 27 jungogo, saka kinük-kisang ajaklen yi talubosa angur, anungji Arogoi iba tongbang ya mokoki anüngdaka lir. Yi kija ya temenen masü. Arogo nung karbo yi majemertem ang tamajungba lir. Süra Arogoia kechi ashir? Yisu alima nung alidang Pai tim masüba anema tensa balala nung ola adokba, jembiba aser inyakba angur. Yisui anemsü lenirtem, yimtenren nung ochimashirtem, tesempa aser loktiliba nung tim masüba mapatem anema jembi. Yisu-i tepetzük tia nung alirtem tenzük, sensakertem kümzük, ki malir nem tejenokdak agütsü, ainer dang temeim sayu, anibelemer nem tashi agütsü aser meimchirtem meim. Arogoia Pa tsüngsü nung anidaka inyak nung koda? Joko Tenla kidang sabang nungi sayutsüngiba kija agibo alima memelenshitsü, iba dak alia Arogoi talila awa-a oa inyaktsü nüngdaker. Tanü Naga lima nung ochimashi anema odiodia jembir tasütait sayutsüngir/Tsüngrem tenzüker nüngdaker.  Anna Hazare-i ochimashi anema anti-corruption bill atema lumia longkak aita takhangba agütsü, aser tesüsabo India sorkari pa matsüngdang apudaktsüsa aküm süra Arogotemibo tuluka inyatettsü. Joko asen lima nung Arogo telung nunga ochimashi aitdaktsüogo, anungji Nagaland merüktettsü atema Arogo tama merüktettsüla. Khristan yimsü ya yimtenren tashi ka masü, mitkar tashi ka masü, saka Khrista mesükba nung taküm aliba lir, anungji tashiyim amshia longkak aitbabo tim masütsü saka ochimashi anemabo ola adoktsüla. Tanü putu nungang ka Yisu Nagaland nung lishi asü nunga Pai asen lima nung tesempa, nükmerem aser ochimashi jenti aliba ya ngur mokorai alitsü asü langkbo inyakla ta asenoki shisadangdi? Mapang kaka nungbo Arogotemi Khrista tsüngsü nung jajaa ochimashi anema tasü itta ochi jembitsüla. Ashiko, Khristantemi ochimashi anema ola adoktsüji temenen ama bilemer südi mesüra aremzüker südi, saka ola adoktsüba mapang ka nung ola madoki aremzükba agibo takoksa ang tulu angutsü.