Mel B-i cocaine aser alcohol tali chia ajemba agi kibong nung timtem adok

London, September 2 (Agencies) : Kentener Mel B ya cocaine aser yi na addict kümer mapang talangka item temesepba chiyungtsütem adoktsü raraba ajanga lai kibong aser tanur anepalu mesüteti timtem alu, ta tang la dang nungi pila dang alisang la kinungbo Stephen Belafonte-ibo metetdaktsü.
Pai metetdaktsüba nungji court nem agütsüba shidi ka dena lir aser iba nungji “America’s Got Talent” judge la ya party drug aser alcohol addict liasü ta la kinungboi shia lir, ta osang ajanga ashi.
Kasa shidi nungji Beverly Hills marriage therapist Charles Sophy-i, Mel B aser Belafonte na tsüngda text message sütepba agi nungita tena kibong pilar aliba ajanga kinungbo Belafonte-i tena tanur asem atema lendong lir ta sensena bilmer, ta ashi.
Osang kar ajanga ashiba agi, tena kibong pilatsüsa akümba ya Mel B-i cocaine asee yi tali chia ajemba ajanga lir.
” Mel-i kidang teti Belafonte dak tai mali sür nung tai tnglokja rara menaa aru, ta osang nungji shisema lir.
Pai agütsüba shidi nungji, Belafonte-i, “Ni tetsübutibaji tanurtem kümzüka alitsü atema lir kechiba süra lai addict ka liasü aser lai cocaine o yi na chia ajemtsü kanga mejungi yimya sübar liasü,” ta shia lir.
“Ano tensa tamajungba akümbaji, lai kidang tanur repranga alila tetsüra aridokatok, iba tetsür ya tanurtem den 2010 nungi külemi liasü aser balakata kidang tanur reprangtsüpur shinga maliba mapang ni la nem tanur anasa temesepba mozütem aser yi mamshidaktsünüba ajanga ni kanga tsübu. Lai item yimya meindokba ajanga küna kibong nung tebilemtsü tuluka aküm aser iba ya tanur reprangla, tamur asem aser la indang therapist, Dr Sophy nungeri kuli agütsütsü,” ta paisa ashi.