Metsü ajema achiba ajanga BP tajemba mekümdaktsür

New Delhi, April 26 (Agencies): Metsü ajema achiba ajanga Blood Pressure (BP) majemdaktsür mesüra nisung ka ‘hypertension’ nungi kümzüka mayor, ta bushisüngdang tasen ka ajanga ngutetogo.
“Onoki ‘sodium’ ajema aliba chiyongtsü achiba ajanga BP ajemdaktsüba nung teyari agütsüba temaitsü kecha mangu,” ta Boston University School of Medicine nung Associate Professor of Medicine, Lynn Moore-i ashi.
Iba bushisüngdang tasen ya ‘Experimental Biology’ 2017 senden Chicago nung April 22 nungi 26 tashi amongdang lemsatepa liasü. Iba bushisüngdang tasen ajanga tang America nunger atema chiyongtsü achiba yimya nung tetyuyba agüja aliba nung tashishitsü adokdaktsür.
“Onoki ngutetba ajanga tang ‘sodium’ achiba yimya nung tetuyuba agüja aliba ya meshidak ta ngutetogo,” ta Moore-isa ashi.
2015 nungi 2020 tashi America nunger atema ‘Dietary Guideline’ nung, anema aliba nisung kati anogo nung ‘sodium’ milligram 2,300 dang achitsüba tetuyuba agüja lir.
Iba asoshi bushisüngdanger temi ‘Framingham Offspring Study’ nung shilem agir arishi küm 30 nungi 64 tashi nung aliba nisung 2,632 asadanga liasü.
Iba bushisüngdang tenzükdang parnok ajak BP shidak dang liasü.
Aji saka küm 16 tsüngda parnok asadanga arudang bushisüngdangertemi ngutetba agi, parnok rongnung anogo nung ‘sodium’ milligram 2,500 dak tali achirtem dang nungi anogo nung ‘sodium’ milligram 2,500 dak tajemba achirtem BP tajungketba liasü.
Item nisungtem dak nungi maneni ngutetba agi, ‘potassium’, ‘calcium’ aser ‘magnesium’ aika achirtem dak BP tajemba aliba nguteta liasü.

You must be logged in to post a comment Login