Metsümeshidak

Akhidang nungi India ajaklen merükmejua alitsü asoshi sorkari sentong balala yanglua inyaka aruaka, ano tang BJP teloki aniba sorkar arur külen balaka nübortem ajungmesoa inyakba angur. Atangji, alima tashitemetet tsütsü India kanga renlokogo, iba jagi anüng petinu tashi tangar tashitemetetter kintem den toktepa India nunger meyong satellite yoka lir. Ajisüaka, aluagi ali nung timtem kaji India nunger aika kidang metsümeshidak maka moapu nung metsümeshir. Iba ama tia ka nung India nunger sensakertemji shirangba mapang nunga metsümeshitsü atema moapu bushia aotsüsa akümer. Ano, kidang aser ki anasa metsümeshidak balaka yanglua makaba jagi tetsürtem balaka kanga timatemer. Ano kidang dang masü saka mapa inyakdak aser kaketrejutem nung metsümeshidak yanglua makaba agi tetsürtemi ajuruba timtemji tetsürtemi dang meteta lir. Aji oda, metsümeshidak balaka yanglua makaba agi alima merükmeju mesütetba dang masü saka talisa tetsürtem asoshi timtem tulu lir. Item timtem aser nüngdakji reprangteta taküm küm nungi balaka linük ajunga nung kima yimdong merüka ayuba den külemi nisung ajak asoshi metsümeshidak peria yanglutsü asoshi sentong tenzükogo. Iba sentong kübok Nagaland nunga metsümeshidak yanglutsü asoshi anghi dictrict shia nung tongtibang nisung kar shimteta nungloktsüba osang asenoki angashiogo, Iba denji ano yakanü Dimapur nung aou agi yangluba metsümeshidak tesem ka sayatsüogo. Atangji, Nagaland nungbo, talisa yimtak yimtsüngtem nung aou agi yangluba metsümeshidak aika yanglua angutsü, ajisüaka Nagaland Bamboo Development Agency purtemi yanglubajisa tajungba asütsü. Anungji, town aser yimtak yimtsüngtem koba nungsa metsümeshidak yanglutsü nüngdaka reprangtetter, item tesemtem ajakji tonga oagi aou agi metsümeshidak yangluba yimyaji ajizüka yanglutsü asoshi sorkari maneni yariteptsü imlar. Atangji, nübortem anema alitsü aser alima topur junga ayutsü atema  metsümeshidak shitak yanglua anepalutsü nüngdaker. Tesem mashi ka nung moapu nung nokdaker tzü endokba aser mashi tesem nung mener jana endokba jagi tzü mopong menendaktsüba dang masü saka alima topur ajung dena raksatsür. Iba ama tangatetbaji nübortem nem agüja pei alidak jana mashi nung meindoktsü aser metsümeshidak yanglua amshitsü atema ajungshiteptsübaji kanga tongtibang kümogo. Ano, asenok ama angatetter saka mangatet aser meteter saka memetet ama benshirtemi tali tajungba angateta benshitsüba maka kaji, asenok aodak mesüra mapa inyakdak yimteni mesüra lokti kari yimkong asoshi metsümeshidak yangluja angutsü. Ibaji asenok ajak meyong lir anungji pei meyong küma merüka ayutsü aser anepalutsübaji senso ajak khuret aser mapa asütsüla. Asenoki metsümeshidak yanglutsüba nüngdakji meteta lir aser merükmejua alitsübajia angateta lir, saka yimkong meyong kiojenjibo asenok meyong amai asenoki mebilemer. Anungji, asenoki amshir tzü tera agi shidoker yutsütsü melen asenoki janaba jana aser natzü ajakji tezüknema menema toktsür. Iba ama shisatsü aser yimya tamajungji memelenshi tashi asen lima nung asenoki yimkong ajungtsü asoshi yangluba kiojen kata junga meyutettsü. Yimtak yimtsüng aser town nung merükmeju mesütetba mapatemji yutsür, asen lima nung Chief minister aser Chief Secretary nati anir tematiba lenirtem aser tashitemetetertem mapa inyakdak Civil Secretariat, Kohima nung yimkong asoshi sen aika endoka yangluba metsümeshidak tesemtembo teshinem aser tezüknem agi anasai ao majung yua aliba tia ka asenoki angutsü. Atangji, tanübo asenoki aou agi metsümeshidak ka yanglua angh nem semzükdaktsübaji takok tulu angu ama bilema pelateper. Atangji ajia takok ka asütsü. Iba denji ano, Civil Secretariat nung aliba metsümeshidak amaji, kongsa yimkong asoshi metsümeshidak yanglua lir, itemjia mamadoki anepalutsüla.

You must be logged in to post a comment Login