Mexico-i 7 buba CONCACAF Gold Cup takok marok agizükgo

Mexico asayartemi goal 3-1 agi Jamaica madak takok ngua CONCACAF Gold Cup takok marok agizükba sülen pelatepba noksa nung angur. (Philadelphia, July 27)

Philadelphia, July 27 (Agencies): Mexico teloki goal 3-1 agi Jamaica madak final asaya koka 7 buba CONCACAF Gold Cup takok marok yashi Deobar nü agizükogo.
Yashi asaya nung Andres Guardado, Jesus Corona aser Oribe Peralta nungeri goal ka ka agüja par Mexico nem takokbaji bener arutsü.
Jamaica-i US madak semifinal nung takok ngua final nung tan mezüngsüa shilem agitsü jenjang angu saka par teloki final asaya nungbo tamakok ajurua liasü.
Yashi asaya tenzüker minute 27 buba tashi nung Mexico teloki goal ka danga magütsüteti asaya saka Paul Aguilar-i yanglutsüba cross ball kanga junga agizüka Guardado-i asaya tenzüker minute 31 buba nung par telok asoshi mezüngbuba goal agüja par Mexico telok temaba jenjang nung ajungkettsü.
Guardado-i yashi agütsüba goal-ji züngsema tan asayamong nung 6 buba goal agütsür liasü.
Asaya tanabuba shilem nung, asaya tenzüker minute 47 buba nung Corona-ia Jamaica asayar Michael Hector nungi ball rakzükba sülen Jamaica nunger asayarsa, Wes Mogan temera tekübokleni ball metsüokja par Mexico telok asoshi tanabuba goal agütsü.
Yamaji asayar külen, Oribe-i asaya tenzüker minute 61 nung goal 1 agüja par Mexico goal 3-0 agi Jamaica telok den temaba jenjang kümdaktsü.
Darren Mattocks-ia asaya tenzüker minute 80 buba nung par Jamaica telok asoshi goal 1 agütsü saka tatem nung par teloki tamakok ajurutsüsa aküm.