Mexico nung menoknok tesashi anok, nisung 224 asü

Mexico nung menoknok tesashi anok, nisung 224 asü

Mexico City, September 20 : Mexico City, Mexico nung September 19, 2017 anogo menoknok tesashi anoka kiojen aika raksatsür alidak ketdangsertemi nisung bushiba mapang paramedics tem atateba aliba noksa nung angur.

Mexico City, September 20 (Agencies): 1985 küm sülen takoksa aser tesama tulutiba adokdakja Mexico nung menoknok Richter scale nung 7.1 magnitude anoka nisung 224 asü, aser Mexico yimtiba kisüng nunga nisung 117 asü.
Mongulbarnü iba menoknok tesashi anokba ya 1985 küm anokba den kasa lir aser iba küm anokba ya Mexico linük otsü nung tesashitiba liasü.
Mexico City south tsütsü aliba Enrique Rebsamen primary school ka floor asem aliba chirepa kaketshir 21 den lanur pezü asü, ta osang ajanga ashi.
Mexico City nung nisung million 20 alir aser iba yimti nung tajemba agi building tulu 49 chirep.
Ki chirepba telung nung nembanga aliba nisungtemi parnok kinünger dang parnok kümzüktsü asoshi WhatsApp nung osang agütsür, ta iba tesem nung aliba osangbener temi ashi.
1985 küm Mexico nung menoknok tesashi anoker küm 32 ajungba mapang iba mesük menoknok ya anoker. Iba küm Mexico nung menoknok ajanga nisung 10,000 taküm samatsü.
Mexico nung menoknok tesashi ka anoka Oaxaca aser Chiapas nung nisung 100 jungnüa tepsetba den nisung 200 dak tali yirutsür anogo 12 dang lir Mongulbarnü iba menoknok tesashi ya anok.
Mexico yimtiba nung jara aser atsü onshishia anokshiba mapang nüburtem aika pei taküm kümzüktsü mechi kimai asemtepa ao.
“Ni kanga shisabulur. Ni ajepba manenteter. Ibai 1985 küm anokba ama lir,” ta arishi küm 52 tain Georgina Sanchez-i osangbener dang ashi.
Ketdangsertemi menoknok indang ‘drill’ agir ghonda eshika dang lir iba menoknok ya anok tenzük.
Menoknok anokba sülen yimti nung rongrongshirong tulu adok. Lenmang nung gari tem marakzüi aküm aser nüburtem gari o gari tsüngta asemzüa liasü.
Tesem aika nung ki tulu chirepba longsang aser yin arangtepa aliba nungi nüburtem kati ka kümzüktsü meranga liasü.
Emergency workers temi nüburtem dang ola madoki alitsü metetdaktsü, kechiaser iba ajanga parnoki tasü nungi jenbua aliba nisungtem indang ola angashitsü tasak liasü.
“Iba menoknok anokba sülen Roma district nung aliba school-i ozü tanur bushia ni ao saka school ki chirper liasü. Saka tia kaa ozü tanurtem ajunga kümzüka liasü,” ta Mexico City nung alir Spain nunger arishi küm 49 tain, Jorge Lopez-i ashi.
“Onok school atongdang nisung ajunga jeptepa liasü, nisung ajunga taoksa tia nung liasü aser tanurtem ya lisü nung amiter liasü,” ta pai ashi.
Iba anasa aliba mozüki nung aliba shirangertem ya yipten aseer wheelchair nung mendaktsür anizük.
Iba menoknok ajanga Mexico City nung aliba international airport ya ghonda asem dang tali shibanga ayu.
Nüburtem aika pei talidak ki raksar asünung yimdong aser park nung mejangtsü renemer, ta osang ajanga ashi.
Iba ama tensa ka nung shi auor tem temai adoka nüburtem indang oset balala rakzükraktemtsü tenzüker, ta osang ka ajanga ashi.

You must be logged in to post a comment Login